ရန်ကုန်၊ ဇွန် ၈
ရန်ကုန်တောင်ပိုင်းခရိုင်၊ သန်လျင်မြို့နယ်နှင့် ရန်ကုန်အရှေ့ပိုင်းခရိုင် သာကေတမြို့နယ်တို့ကို ဆက်သွယ်တည်ဆောက်ထားသည့် ပဲခူးမြစ်ကူး သန်လျင်တံတားအမှတ် (၃) ကို ဇွန် ၈ ရက်၊ နံနက် ၉ နာရီက ဖွင့်လှစ်ခဲ့ကြောင်း သန်လျင်မြို့နေသူများထံက စုံစမ်းသိရှိရသည်။
“ ဒီနေ့မနက်ပိုင်း ကျိုက်ခေါက်ဘုရားလမ်းမကြီးတစ်လျှောက် လမ်းတွေပိတ်ထားတယ်။ လူကြီးလမ်းကြောင်းလို့ပြောတယ်။ နောက် ၉ နာရီလောက် ရန်ကုန်မြို့ထဲသွားတော့ တံတားဖွင့်ပွဲကျင်းပနေတယ်။ ဘယ်သူတွေလာတယ်ဆိုတာတော့ မသိရပါဘူး။ မွန်းတည့် ၁၂ နာရီခွဲကျတော့ ပဲခူးမြစ်ကူး သန်လျင်တံတားအမှတ် (၃) ကနေ ဖြတ်သန်းခွင့်ပေးလိုက်တယ်။ သန်လျင်အမှတ် (၁) တံတားတော့ သုံးစွဲခွင့်ပိတ်ထားလိုက်တယ်။” ဟု သန်လျင်မြို့နေသူတစ်ဦးက ယနေ့ခေတ်သို့ ပြောသည်။
အဆိုပါ ပဲခူးမြစ်ကူး သန်လျင်တံတားစီမံကိန်းကို ဂျပန်နိုင်ငံအစိုးရ (JICA) အကူအညီဖြင့် ဂျပန်နိုင်ငံ၏ ချေးငွေ ဂျပန်ယန်း ၃၁ ဘီလီယံ အကုန်ကျခံတည်ဆောက်ခြင်းဖြစ်ပြီး ၂၀၁၉ ခုနှစ်၊ ဇွန်လတွင် စတင်တည်ဆောက်ခဲ့ကာ ၂၀၂၁ ခုနှစ်၊ ဖေဖော်ဝါရီလမှ ၂၀၂၂ ခုနှစ်၊ ဖေဖော်ဝါရီအထိ တစ်နှစ်ခန့်ကြာ တံတားတည်ဆောက်ရေးရပ်နားခဲပြီး ၂၀၂၂ ခုနှစ်မှ ပြန်လည်တည်ဆောက်ရေးလုပ်ငန်း ဆောင်ရွက်ခဲ့ကြောင်း သိရသည်။
ပဲခူးမြစ်ကူး သန်လျင်တံတားအမှတ် (၃)သည် အသွားနှစ်လမ်း၊ အပြန်နှစ်လမ်း လေးလမ်းတံတားစနစ်ဖြစ်ပြီး၊ ယာဉ်တစ်စီးချင်းခံနိုင်ဝန်သည် ၇၅ တန်ဖြစ်ကြောင်း သိရသည်။
သန်လျင်မြို့နယ်၌ သီလဝါအထူးစီးပွားရေးဇုန် & Myanmar International Terminals Thilawa (MITT)သီလဝါဆိပ်ကမ်းတို့ကို အကောင်အထည်ဖော်ဆောင်ရွက်လျက်ရှိခြင်းကြောင့် ကုန်စည်စီးဆင်းမှုအဝင်အထွက်များကို အထောက်အကူပြုစေမည်ဖြစ်ပြီး အချိန်တိုအတွင်း ဆက်သွယ်သွားလာနိုင်မည်ဖြစ်ကြောင်း သိရသည်။
အလားတူ ရန်ကုန်တောင်ပိုင်းခရိုင်ရှိ သန်လျင်မြို့နယ်၊ ကျောက်တန်းမြို့နယ်၊ ခရမ်းမြို့နယ်နှင့် သုံးခွမြို့နယ်တို့ရှိ ဒေသခံပြည်သူများစွာတို့၏ လူမှုစီးပွားဘဝတိုးတက်မှုများကိုဖြည့် ဆည်းပေးနိုင်မည်ဖြစ်ကြောင်း သိရသည်။
ပဲခူးမြစ်ကူး သန်လျင်တံတားအမှတ် (၃) ပေါ်တွင် မော်တော်ယာဉ်များကို မွန်းတည့် ၁၂ နာရီခွဲမှစတင်၍ ဖြတ်သန်းခွင့်ပြုလိုက်ပြီး လမ်းတံတားကြေးကောက်ခံခြင်းမရှိသေးကြောင်း သိရသည်။
အဆိုပါ တံတားသည်အရှည် ၃၅၀၀ မီတာရှိပြီး ပင်မတံတားအကျယ် ၂၂ ဒသမ ၉ မီတာ၊ ရေလမ်းကင်းလွတ်အမြင့် ၁၃ မီတာရှိပြီး ဂျပန်နည်းပညာဖြင့် ဂျပန်အတိုင်ပင်ခံအင်ဂျင်နီယာများက တည်ဆောက်ရေးလုပ်ငန်းများ ပူးပေါင်းဆောင်ရွက်ခဲ့ကြောင်း သိရသည်။
မြင့်မြတ်အောင်မြင် ဓာတ်ပုံ – MMAM
သန်လျင်တံတားအမှတ် (၃) ယနေ့ဖွင့်လှစ် အတွက် မှတ်ချက်များ 0 ခုရှိပါတယ်