ရန်ကုန်၊ ဇွန် ၁၀
ရန်ကုန်တောင်ပိုင်းခရိုင်၊ သန်လျင်မြို့နယ်နှင့် ပဲခူးမြစ်အား ဖြတ်သန်းတည်ဆောက်ထားသည့် သန်လျင်တံတားအမှတ် (၃) ကို ဇွန် ၈ ရက်နေ့ကဖွင့်လှစ်ခဲ့သည်။ လတ်တလောတွင် တံတားဖြတ်သန်းခပေးဆောင်ရန်မလိုသေးပဲ၊ ဇွန် ၁၆ ရက်နေ့မှစတင်ကာ တံတားဖြတ်သန်းခများ စတင်ကောက်ခံမည်ဖြစ်ကြောင်း သိရသည်။
“သန်လျင်တံတားအမှတ် (၃) မော်တော်ယာဥ်ဖြတ်သန်းခတွေကို ဇွန် ၁၆ ရက်မှာ စတင်ကောက်ခံသွားပါမယ်။ အခုတစ်ပတ်တော့ အခမဲ့ဖြတ်သန်းခွင့်ပေးထားပါတယ်။ ဇွန် ၁၆ ရက်နေ့မှ လမ်းတံတားကြေး ကောက်ခံမှာပါ။ နောက်ပြီး ငွေသားအပြင် QR Code စနစ်ဖြင့်လည်း ပေးဆောင်နိုင်ပါတယ်။” ဟု သန်လျင်တံတားတည်ဆောက်ရေး၊ ဆောက်လုပ်ရေးဝန်ကြီးဌာနမှ တာဝန်ရှိသူတစ်ဦးက ယနေ့ခေတ်သို့ ပြောသည်။
အဆိုပါ လမ်းတံတားဖြတ်သန်းခများကို ဇွန် ၁၆ ရက်မှ စတင်ကောက်ခံသွားမည်ဖြစ်ပြီး ဇွန် ၈ ရက်မှ ဇွန် ၁၅ ရက်ထိ တစ်ပတ်ခန့် အခမဲ့ဖြတ်သန်းခွင့်ပြုထားကြောင်း သိရသည်။
လမ်းတံတားကြေး ပေးချေလိုခြင်းမရှိပါက သန်လျင်တံတားအဟောင်းမှ ဖြတ်သန်းသွားလာနိုင်ကြောင်း သန်လျင်တံတားတည်ဆောက်ရေး၊ ဆောက်လုပ်ရေးဝန်ကြီးဌာနမှ တာဝန်ရှိသူတစ်ဦးက ယနေ့ခေတ်သို့ ပြောသည်။
သန်လျင်တံတားအမှတ်(၃) လမ်းတံတားအသုံးပြုခကို အိမ်စီးကားသုံးတန်အောက်၊ Landcruiser, Wish, Alphard, Double Cab, Super Custom ယာဉ်နှင့် ကုန်တန်ချိန်သုံးတန်အထိ ကျပ် ၅၀၀ နှုန်းသတ်မှတ်ထားပြီး၊ ခရီးသည်တင်ယာဉ်(ငယ်)၊ ဟိုင်းလတ်၊ လိုက်ထရပ်၊ ဒိုင်နာ၊ ကင်တာယာဉ်နှင့် ကုန်တန်ချိန် ခြောက်တန်အထိ ကျပ် ၁၀၀၀ နှုန်း သတ်မှတ်ထားကြောင်းနှင့် ခရီးသည်တင်ယာဉ် (လတ်)၊ Minibus, BM, ခရီးသည်တင်ယာဉ် (ကြီး)၊ ဟီးနိုး၊ ဟွန်ဒိုင်း၊ ယာဉ်နှင့် ကုန်တန်ချိန် ၂၁ တန်အထိ ကျပ် ၂၀၀၀ နှုန်းသတ်မှတ်ထားပြီး ကုန်တင်ကား (ငယ်)၊ ၆ ဘီး ၈ ဘီး ကုန်တင်ယာဉ်ယာဉ်နှင့် ကုန်တန်ချိန် ၂၁ တန်အထိ ကျပ် ၄၀၀၀ နှုန်းသတ်မှတ်ထားကြောင်း သိရသည်။
ထို့ပြင် တန်ပိုဒဏ်ကြေး ကျပ် ၁၂,၀၀၀ နှုန်း၊ ကုန်တင်ကား(ကြီး)၊ ၁၀ ဘီး ၁၂ ဘီး ၁၄ဘီး၊ တွဲကားကုန်တင်ယာဉ်နှင့် ကုန်တန်ချိန် ၃၄ တန်အထိ ကျပ် ၁၂,၀၀၀ နှုန်းနှင့် တန်ပိုဒဏ် ကြေးကျပ် ၂၂,၀၀၀ နှုန်း၊ ကုန်တင်တွဲ ကား ၁၈ ဘီး ၂၂ ဘီးတွဲကားယာဉ်နှင့် ကုန်တန်ချိန် ၅၀ ဒဿမ ၅ တန်အထိ ကျပ် ၂၂,၀၀၀ နှုန်းနှင့် တန်ပိုဒဏ်ကြေးကျပ် ၆၆,၀၀၀ နှုန်း အသီးသီးကောက်ခံသွားမည်ဖြစ်ကြောင်း သန်လျင်တံတားတည်ဆောက်ရေး၊ ဆောက်လုပ်ရေးဝန်ကြီးဌာနမှ တာဝန်ရှိသူတစ်ဦးက ယနေ့ခေတ်သို့ ပြောသည်။
မြင့်မြတ်အောင်မြင်
ဓာတ်ပုံ – MMAM
သန်လျင်တံတားအမှတ်(၃) တံတားဖြတ်သန်းခကို ဇွန် ၁၆ ရက်တွင် စတင်ကောက်ခံမည် အတွက် မှတ်ချက်များ 0 ခုရှိပါတယ်