ရန်ကုန်၊ ဖေဖော်ဝါရီ ၁၆
ရန်ကုန်တိုင်းဒေသကြီး၊ လှိုင်မြို့နယ်၊ (၁၂)ရပ်ကွက်၊ ဘာတာစျေးတွင် ဖေဖော်ဝါရီ ၁၆ ရက်၊ နံနက် ၁၂ နာရီက မီးလောင်မှုဖြစ်ပွားရာ စျေးဆိုင်ခန်းအားလုံး မီးလောင်ဆုံးရှုံးခဲ့ရကြောင်း သိရသည်။
တစ်နာရီကျော်ခန့်ကြာ မီးလောင်မှုဖြစ်ပွားခဲ့ပြီး စျေးအတွင်းရှိ ဆိုင်ခန်းအားလုံး (၁၀၀ ကျော်) မီးလောင်ဆုံးရှုံးသွားခဲ့ကြောင်း မြန်မာနိုင်ငံမီးသတ်တပ်ဖွဲ့ထံမှ စုံစမ်းသိရှိရသည်။
“ မီးလောင်မှု Level-2 အဆင့်ပါ။ စျေးအတွင်းထဲမှာ လှိုက်လောင်သွားတာပါ။ စျေးဆိုင်ခန်းပိုင်ရှင်တွေ ဘာမှပြန်မရတော့ပါဘူး။ ဘယ်လို မီးလောင်မှုစတင်ဖြစ်ပွားတယ်ဆိုတာ စုံစမ်းစစ်ဆေးနေဆဲပါ။ ပျက်စီးဆုံးရှုံးမှုများပါတယ်။” ဟု မြန်မာနိုင်ငံမီးသတ်တပ်ဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
အဆိုပါမီးလောင်မှုသည် သားငါးစျေးတန်းဖက်မှစတင်၍ မီးလောင်မှုဖြစ်ပွားခဲ့ပြီး စျေးမီးလောင်မှုကြောင့် လုံခြုံရေးဝန်ထမ်းများနှင့် စျေးတာဝန်ခံများကို သက်ဆိုင်ရာမှ ခေါ်ယူစစ်ဆေးနေကြောင်း သိရသည်။
မီးလောင်မှုဖြစ်ပွားရာသို့ မြန်မာနိုင်ငံမီးသတ်ဦးစီးဌာနက Level2 အဆင့်ထိသတ်မှတ်ပြီး မီးငြှိမ်းသတ်ပေးခဲ့ကာ တစ်နာရီကျော်ခန့်ကြာ မီးငြိမ်းခဲ့ရကြောင်း သိရသည်။
ထို့အတူ ရန်ကုန်တိုင်းဒေသကြီး၊ မြောက်ဥက္ကလာပမြို့နယ်၊ သီရိရတနာစျေးတွင် ဖေဖော်ဝါရီ ၁၄ ရက်၊ နံနက် ၃ နာရီ ၅၀ မိနစ်က မီးလောင်မှုဖြစ်ပွားခဲ့ပြီး စျေးဆိုင်ခန်း ၁၀ ခန်းကျော် မီးလောင်ပျက်စီးဆုံးရှုံးခဲ့ရကြောင်း သိရသည်။
#မြင့်မြတ်အောင်မြင်
ဓာတ်ပုံ – မြန်မာနိုင်ငံမီးသတ်တပ်ဖွဲ့
#ယနေ့ခေတ်
လှိုင်မြို့နယ်၊ (၁၂)ရပ်ကွက် ဘာတာဈေးမီးလောင် စျေးဆိုင်ခန်းအားလုံးဆုံးရှုံး အတွက် မှတ်ချက်များ 0 ခုရှိပါတယ်