ရန်ကုန်၊ ဇန်နဝါရီ ၁၃
အင်တာနက် လူမှုကွန်ရက်စာမျက်နှာထက်တွင် ညစ်ညမ်းဗီဒီယိုနှင့် တေးသီချင်းများ ရိုက်ကူးထုတ်လွှင့်လျှင် အရေးယူမည်ဟု ဇန်နဝါရီ ၁၃ ရက်နေ့စွဲဖြင့် ပြန်ကြားရေးဝန်ကြီးဌာနက သတိပေးချက်တစ်ရပ် ထုတ်ပြန်လိုက်ကြောင်း သိရသည်။
“ အင်တာနက် လူမှုကွန်ရက်စာမျက်နှာတွေမှာ အများပြည်သူ အမြင်မသင့်တဲ့ ညစ်ညမ်းဗီဒီယိုနဲ့ တေးသီချင်းများ ရိုက်ကူးထုတ်လွှတ်ခြင်းတွေကို ထိရောက်စွာ အရေးယူဆောင်ရွက် သွားပါမယ်။ ၁၉၉၆ ခုနှစ် ရုပ်ရှင်ဥပဒေနဲ့ ၁၉၉၆ ခုနှစ် ရုပ်မြင်သံကြားနဲ့ ဗီဒီယိုဥပဒေနဲ့အညီ အရေးယူဆောင်ရွက်သွားပါမယ်။” ဟု ပြန်ကြားရေးဝန်ကြီးဌာန မှတာဝန်ရှိသူတစ်ဦးက ယနေ့ခေတ်သို့ ပြောသည်။
လက်ရှိ အင်တာနက် လူမှုကွန်ရက်စာမျက်နှာများတွင် တေးသီချင်းဗီဒီယို ရိုက်ကူးထုတ်လွှင့်သူများက မိမိတို့ထင်ပေါ်ကျော်ကြားမှု ရရှိစေရန်ရည်ရွယ်၍ မြန်မာ့ယဉ်ကျေးမှု အမွေ အနှစ်များကိုဆန့်ကျင်ပြီး မောင်နှမသားချင်း၊ မိသားစုဝင်ချင်း အတူကြည့်ရှုရန်ပင် မသင့်လျော်သည့် ဟီရိသြတ္တပ္ပတရားကင်းမဲ့သော တေးသီချင်းဗီဒီယိုများကို ရိုက်ကူးထုတ်လွှင့် နေမှုတချို့ကို စိစစ်တွေ့ရှိခဲ့ရကြောင်း ပြန်ကြားရေးဝန်ကြီးဌာန၏ ထုတ်ပြန်ချက်အရ သိရသည်။
ထို့ကြောင့် လူမှုကွန်ရက်စာမျက်နှာထက်တွင် မြန်မာ့ယဉ်ကျေးမှုအမွေအနှစ်ကို ဆန့်ကျင်သော၊ ညစ်ညမ်းသောအပြောအဆို၊ အပြုအမူများပါဝင်သည့် ရိုက်ကူးထုတ်လွှင့် ဖော်ပြမှု များနှင့်ပတ်သက်၍ ထုတ်လုပ်သူ၊ စီစဉ်ရိုက်ကူးသူ၊ သရုပ်ဆောင်သူများအား တည်ဆဲဥပဒေများနှင့်အညီ အရေးယူဆောင်ရွက်သွားမည်ဖြစ်ကြောင်း ပြန်ကြားရေးဝန်ကြီးဌာန၏ ထုတ်ပြန်ချက်၌ ဖော်ပြထားရှိသည်။
မြင့်မြတ်အောင်မြင်ဓါတ်ပုံ – လူမှုကွန်ရက်
လူမှုကွန်ရက် စာမျက်နှာထက်တွင် ညစ်ညမ်းဗီဒီယိုနှင့် တေးသီချင်းများ ရိုက်ကူးထုတ်လွှင့်လျှင် အရေးယူမည် ဟုဆို အတွက် မှတ်ချက်များ 0 ခုရှိပါတယ်