ရန်ကုန်၊ ဇန်နဝါရီ ၁၂
ရှမ်းပြည်နယ်(မြောက်ပိုင်း)၊ လားရှိုးမြို့အနီးရှိ အီနိုင်းကျေးရွာ ရှောင်ကွင်းလမ်းမှ တံတားတစ်စင်းမှာ ယမန်နေ့ညက မိုင်းပေါက်ကွဲမှုကြောင့် ပျက်စီးခဲ့ကြောင်း ဒေသခံများထံမှ သိရသည်။
အဆိုပါ တံတားမှာ လားရှိုး-နမ္မတူ ကားလမ်းပေါ်ရှိ အီနိုင်းကျေးရွာရှောင်ကွင်းလမ်းတွင် ဆောက်လုပ်ထားသည့် တံတားတစ်စင်းဖြစ်ပြီး ယမန်နေ့ညက မိုင်းပေါက်ကွဲ၍ ပျက်စီးခဲ့ ကြောင်း သိရသည်။
“ ညက ပေါက်ကွဲသံတစ်ချက်ကြားရပြီး မနက်ကျတော့ တံတားကျိုးသွားတာတွေ့ရတာ။ ပြီးခဲ့တဲ့ရက်ပိုင်းက အီနိုင်းတံတားကျိုးသွားတော့ ရှောင်ကွင်းလမ်းကိုအသုံးပြုပြီး သွားနေ ရတာ။ အခုကျတော့ ရှောင်ကွင်းလမ်းကတံတားပါပျက်သွားတော့ ဘယ်လိုမှ သွားမရတော့ဘူး။” ဟု ဒေသခံတစ်ဦးက ပြောသည်။
မိုင်းပေါက်ကွဲ၍ တံတားတစ်စင်းလုံး ကျိုးကျပျက်စီးခဲ့ကြောင်း သိရသည်။
ပြီးခဲ့သည့် ဇန်နဝါရီ ၁ ရက်က လားရှိုးမြို့နှင့် နမ္မတူမြို့ကို ဆက်သွယ်ထားသည့်လမ်းပေါ်ရှိ အီနိုင်းကျေးရွာတွင် တည်ဆောက်ထားသည့် အီနိုင်းတံတားမှာ မိုင်းပေါက်ကွဲ၍ ပျက် စီးခဲ့သဖြင့် ခရီးသွားများမှာ အီနိုင်းကျေးရွာအနီး ရှောင်ကွင်းလမ်းကိုအသုံးပြု၍ သွားလာလျက်ရှိရာမှ ယမန်နေ့ညက အဆိုပါလမ်းပေါ် ရှိတံတားပါ ပျက်စီးခဲ့ခြင်းဖြစ်သည်။
အဆိုပါနေရာအနီးတွင် နစကတပ်များနှင့် TNLA လက်နက်ကိုင်အဖွဲ့တို့အကြား ပြီးခဲ့သည့်ရက်ပိုင်းက တိုက်ပွဲအချို့ ဖြစ်ပွားခဲ့ကြောင်းသိရပြီး တံတားအား မည်သည့်အဖွဲ့က မိုင်းခွဲ ဖျက်စီးခဲ့သည်ကိုမသိရကြောင်း ဒေသခံများက ပြောသည်။
အီနိုင်းတံတားနှင့် အီနိုင်းကျေးရွာ ရှောင်ကွင်းလမ်းပေါ်ရှိ တံတားတို့ပျက်စီးခဲ့၍ လားရှိုးမှ နမ္မတူနှင့် နမ့်ဆန်မြို့များသို့ သွားလာရခက်ခဲသွားကြောင်း ဒေသတွင်းသတင်းများအရ သိရသည်။
အလားတူ ဒီဇင်ဘာ ၂၈ ရက်၊ ညပိုင်းကလည်း သီပေါမြို့နှင့် နမ္မတူမြို့တို့ကို ဆက်သွယ်ထားသည့် မိုးတေတံတား မိုင်းခွဲခံရ၍ ကျိုးကျပျက်စီးခဲ့ပြီး ထိုဒေသတွင် လမ်းပန်းဆက်သွယ် ရေး ပြတ်တောက်လျက်ရှိနေကြောင်း သိရသည်။
ထို့အတူ နှစ်ဖက်တိုက်ပွဲကြောင့် ဒီဇင်ဘာ ၁ ရက်နေ့က သီပေါ-လားရှိုးလမ်းပေါ် ရှိ စဉ့်အင်တံတား၊ နိုဝင်ဘာ ၁၃ ရက်က သီပေါ-ကျောက်မဲလမ်းပေါ်ရှိ ကျင်သီတံတားတို့ ပျက်စီး ခဲ့ပြီး ယနေ့အထိ ပြင်ဆင်နိုင်မှုမရှိသေးကြောင်း သိရသည်။
ရှမ်းပြည်နယ်(မြောက်ပိုင်း)၌ နှစ်လကျော်ကြာ တိုက်ပွဲအတွင်း ဒေသခံလူထု၏ လမ်းပန်းဆက်သွယ်ရေးအတွက် အရေးပါသည့် တံတားငါးစင်းထက်မနည်း ဖျက်စီးခံခဲ့ရကြောင်း ဒေသတွင်းသတင်းများအရ သိရသည်။
ဓာတ်ပုံ – စီဂျေ
လားရှိုးအနီးရှိ အီနိုင်းရွာ ရှောင်ကွင်းလမ်းမှ တံတားတစ်စင်း မိုင်းကွဲ၍ ပျက်စီး အတွက် မှတ်ချက်များ 0 ခုရှိပါတယ်