ဒေးဒရဲ၊ မေ ၂၄
ဧရာ၀တီတိုင်း၊ ဖျာပုံခရိုင်၊ ဒေးဒရဲမြို့နယ်မှ လက်နက်များနှင့်အတူ ဖမ်းဆီးခံထားရသည့် လူငယ်သုံးဦးကို ဖျာပုံခရိုင်တရားရုံးမှ မေလ ၁၆ ရက်က ထောင်ဒဏ်တစ်သက်တစ်ကျွန်းနှင့် နှစ်ရှည်ထောင်ဒဏ်များ အသီးသီးချမှတ်ခဲ့ကြောင်း အကျဉ်းထောင်နှင့်နီးစပ်သူများထံမှ သိရသည်။
ထောင်ဒဏ်တစ်သက်တစ်ကျွန်းနှင့် နှစ်ရှည်ထောင်ဒဏ် ချမှတ်ခံရသူများသည် ကိုလှိုင်မျိုးကျော်၊ ကိုစိုးမိုးနှင့် ကိုငှက်ကလေးတို့ဖြစ်ပြီး၊ ကိုလှိုင်မျိုးကျော်ကို ထောင်ဒဏ်တစ်သက်တစ်ကျွန်း၊ ကိုစိုးမိုးနှင့် ကိုငှက်ကလေးကို ထောင်ဒဏ် ၁၅ နှစ်စီ ချမှတ်ခဲ့ခြင်းဖြစ်သည်ဟု ဆိုသည်။
“ ကိုလှိုင်မျိုးကျော်ကတော့ တစ်ကျွန်းချခံရတယ်။ ကျန်နှစ်ဦးကတော့ နှစ်ရှည်ထောင်ဒဏ် ၁၅ နှစ်စီချမှတ်ခံခဲ့ရတယ်။ သူတို့အားလုံးကို ဖေဖော်ဝါရီလထဲမှာ သက်ဆိုင်ကဖမ်းဆီးခဲ့တာပါ။ လက်နက်တွေနဲ့အတူတွေ့ရှိတာကြောင့် အကြမ်းဖက်ဥပဒေနဲ့အမှုဖွင့်ပြီး အခုလိုအမိန့်ချတာ။” ဟု အကျဉ်းထောင်နှင့်နီးစပ်သူက ပြောသည်။
ပြီးခဲ့သည့် ၂၀၂၃ ခုနှစ်၊ အောက်တိုဘာလကလည်း ဖျာပုံမြို့တွင် PDF တပ်ဖွဲ့ဝင်ဆိုသူ ၁၄ ဦးကို သက်ဆိုင်ရာကဖမ်းဆီးခဲ့ပြီး ဖျာပုံခရိုင်တရားရုံးက ဖမ်းဆီးခံရသည့်ဒေသခံ ၁၄ ဦးထဲမှ ၇ ဦးကို သေဒဏ်များချမှတ်ခဲ့ပြီး၊ ၇ ဦးကိုနှစ်ရှည်ထောင်ဒဏ်များ ချမှတ်ခဲ့သေးကြောင်း သိရသည်။
ခန့်ခန့်
ယနေ့ခေတ်
လက်နက်များနှင့်အတူဖမ်းမိသည့် လူငယ်သုံးဦးကို နှစ်ရှည်ထောင်ဒဏ်များချမှတ် အတွက် မှတ်ချက်များ 0 ခုရှိပါတယ်