ရန်ကုန်၊ မေ ၂၇
ဆိုင်ကလုန်းမုန်တိုင်း အရှိန်ကြောင့် ရန်ကုန်မြို့နယ် အပါအဝင် တိုင်းဒေသကြီးနှင့် ပြည်နယ်တစ်ဝန်း မိုးကြီးမည်ဟု မိုးလေဝသနှင့် ဇလဗေဒက မေ ၂၇ ရက်၊ နေ့စွဲဖြင့် ထုတ်ပြန်ချက်အရ သိရသည်။
“ ဆိုက်ကလုန်းမုန်တိုင်းအရှိန်ကြောင့် နောက် ၂၄ နာရီအတွင်း ရန်ကုန်မြို့နယ်အပါအဝင် တိုင်းဒေသကြီးနဲ့ ပြည်နယ်တစ်ဝန်းမှာ မိုးကြီးမယ်။ ရေကြီးရေလျှံဖြစ်မယ်။ ကမ်းစပ်နားနေ ထိုင်သူတွေ အခြားနေရာရွှေ့ပြောင်းနေထိုင်ဖို့နဲ့ အထူးသတိပြုဖို့ လိုအပ်ပါတယ်။” ဟု မိုးလေဝသနှင့် ဇလဗေဒမှ တာဝန်ရှိသူတစ်ဦးက ယနေ့ခေတ်သို့ ပြောသည်။
အဆိုပါဆိုင်ကလုန်းမုန်တိုင်း “ရီမယ်(လ်)” (REMAL) သည် ဘင်္ဂလားဒေ့ရှ်နိုင်ငံနှင့် ဆက်စပ်လျက်ရှိသော အိန္ဒိယနိုင်ငံ၊ အနောက်ဘင်္ဂလားပြည်နယ် ကမ်းခြေဒေသများကို ဖြတ် ကျော်ပြီး လာမည့် ၁၅ နာရီအတွင်း တစ်ဖြည်းဖြည်း အားလျော့သွားနိုင်ကြောင်း မိုးလေဝသနှင့် ဇလဗေဒ၏ ထုတ်ပြန်ချက်အရ သိရသည်။
ဆိုင်ကလုန်းမုန်တိုင်း“ရီမယ်(လ်)”(REMAL)၏ အရှိန်ကြောင့် နောက် ၂၄ နာရီအတွင်း နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူး တိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ ကချင်ပြည်နယ်၊ ချင်းပြည်နယ်နှင့် ရခိုင်ပြည်နယ်၊ ချင်းပြည်နယ်တို့တွင် နေရာအနှံ့အပြား မိုးထစ်ချုန်းရွာမည်ဖြစ်ကြောင်း သိရသည်။
အလားတူ ရခိုင်ပြည်နယ်၊ စစ်ကိုင်းတိုင်းဒေသကြီး၊ မကွေးတိုင်းဒေသကြီးနှင့် ကချင်ပြည်နယ်တို့တွင် နေရာကွက်၍မိုးကြီးခြင်း၊ လေပြင်းတိုက်ခတ်ခြင်းများ ဖြစ်ပေါ်နိုင်ကြောင်း အဆိုပါထုတ်ပြန်ချက်အရ သိရသည်။
ဆိုင်ကလုန်းမုန်တိုင်း “ရီမယ်(လ်)” (REMAL)၏ အရှိန်ကြောင့် မိုးသည်းထန်စွာရွာသွန်းခြင်းနှင့် လေပြင်းတိုက်ခတ်ခြင်း၊ ရုတ်တရက်ရေကြီးခြင်း၊ မြေပြိုခြင်းစသည့် သဘာဝဘေးအန္တရာယ်များဖြစ်ပေါ်နိုင်ကြောင်း သိရသည်။
မြင့်မြတ်အောင်မြင် ဓာတ်ပုံ – မိုးလေဝသနှင့် ဇလဗေဒ
ရန်ကုန်မြို့အပါအဝင် တိုင်းနှင့် ပြည်နယ်တစ်ဝန်း မိုးကြီးမည်ဟု မိုးလေဝသနှင့် ဇလဗေဒ ထုတ်ပြန် အတွက် မှတ်ချက်များ 0 ခုရှိပါတယ်