ရန်ကုန်၊ ဧပြီ ၃၀
ရန်ကုန်တိုင်းဒေသကြီးအတွင်း သင်္ကြန်ပြီးပွဲတော်ရက်ပြီးနောက် မြို့နယ်၊ ရပ်ကွက်အလိုက် လျှပ်စစ်မီးပြတ်တောက်မှု ပိုမိုဆိုးရွားနေကြောင်း တောင်ဥက္ကာပမြိူ့နယ်တွင် နေထိုင်သူတစ်ဦးက ယနေ့ခေတ်သို့ ပြောသည်။
“သင်္ကြန်ကာလပြီးနောက်ပိုင်းမှာ မီးပျက်ချိန်က ပိုမှန်တယ်။ မီးလာချိန်က ခန့်မှန်းလို့မရဘူး။ လာချင်မှလဲ လာသလို။ မလာချင်လဲ လုံးဝမလာဘူး။” ဟု တောင်ဥက္ကာပမြို့နယ်တွင်နေထိုင်သူတစ်ဦးက ယနေ့ခေတ်သို့ ပြောသည်။
ယခင်က လျှပ်စစ်မီးကို A/B နှစ်ပိုင်းခွဲထားပြီး တစ်နေ့လျှင် လေးနာရီခြား အလှည့်ကျစနစ်ဖြင့် မီးပေးနေသော်လည်း လက်ရှိအလှည့်ကျ မီးလာရမည့်ချိန် ခန့်မှန်း၍ပင်မရနိုင်ကြောင်း သန်လျင်မြို့နယ်တွင် နေထိုင်သူတစ်ဦးက ယနေ့ခေတ်သို့ ပြောသည်။
“ အရင်က တစ်နေ့ကို လေးနာရီခြား မီးလာပေးတယ်။ အခုက လာချိန်ထက်ပျက်ချိန်က ပိုများနေတယ်။ လေးနာရီမပြောနဲ့ တစ်နေ့ တစ်နာရီပုံမှန်လာပေးဖို့တောင် မနည်းဆုတောင်းနေရတယ်။ အခုဆို မီးပျက်ချိန်များလာတော့ ဖုန်းအားတောင်သွင်းဖို့ အတော်ခက်ခဲပါတယ်။ သက်ကြီးရွယ်အိုနဲ့ ကလေးသူငယ်တွေဆို ပူအိုက်လွန်းလို့ ပန်ကာတောင်ဖွင့်ချိန်မရ။ အတော်လေးခက်ခဲပါတယ်။” ဟု သန်လျင်မြို့နယ်၌နေထိုင်သူတစ်ဦးက ယနေ့ခေတ်သို့ ပြောသည်။
ရန်ကုန်လျှပ်စစ်ဓာတ်အားပေးရေး ကော်ပိုရေးရှင်းက ဓာတ်အားပေးစက်ရုံများကို ဓာတ်ငွေ့ပို့လွှတ်နေသည့် သဘာဝဓာတ်ငွေ့ပိုက်လိုင်း ပြုပြင်နေခြင်းကြောင့် တစ်ပတ်ခန့်သာ လျှပ်စစ်မီးပြတ်တောက်မည်ဟု အသိပေးထားသော်လည်း သင်္ကြန်ကာလပြီး၍ ၁၀ ရက်ကျော်အထိ လျှပ်စစ်မီးပြတ်တောက်ချိန် ပိုမိုများပြားလာကြောင်း သိရသည်။
လက်ရှိ လျှပ်စစ်မီးပြတ်တောက်ချိန် များလာခြင်းကြောင့် ဆိုလာပြားတပ်ဆင်ခြင်းများ အရောင်းသွက်လာကြောင်း ဆိုလာစတား ရောင်းဝယ်ရေးက သိရသည်။
မြင့်မြတ်အောင်မြင်
ဓာတ်ပုံ – CJ
ရန်ကုန်မြို့နယ်တွင် သင်္ကြန်ပြီးနောက် လျှပ်စစ်မီးပြတ်တောက်မှု ပိုမိုဆိုးရွားနေသည် ဟုဆို အတွက် မှတ်ချက်များ 0 ခုရှိပါတယ်