ရန်ကုန်၊ အောက်တိုဘာ ၂၅
ရန်ကုန်တိုင်း၊ မရမ်းကုန်းမြို့နယ်၊ မြစံပယ်လမ်းဘေးတွင် အချင်းတန်းလန်းဖြင့် မွေးကင်းစ ကလေးငယ်တစ်ဦးအား စွန့်ပစ်ထားသည်ကို အောက်တိုဘာ ၂၃ ရက်၊ ည ၉ နာရီက တွေ့ရှိခဲ့ရာ သရုပ်ဆောင် ခိုင်နှင်းဝေက ခေါ်ယူစောင့်ရှောက်ခဲ့ကြောင်း သိရသည်။
“ အချင်းတန်းလန်းနဲ့ ညကြီးပစ်ထားပေမဲ့ ကံကောင်းလှတဲ့သမီးလေး အသက်ရှင်ခွင့်ရသွားလို့ အရမ်းပဲဝမ်းသာမိပါတယ်။ လိုအပ်တာများ လုပ်ဆောင်ပေးတဲ့ “ ရွှေတော်ဝင်” အထူးကုဆေးခန်း၊ “ မြန်မာ့ကြယ်ဖြူ” ပရဟိတအသင်းနဲ့ ရပ်မိရပ်ဖများအားလုံးကို သမီးလေးကိုယ်စား အထူးကျေးဇူးတင်ရှိပါတယ်ရှင်” ဟု သရုပ်ဆောင် ခိုင်နှင်းဝေက ယနေ့ခေတ်သို့ ပြောသည်။
အချင်းတန်းလန်းဖြင့် မွေးကင်းစ မိန်းကလေးငယ်တစ်ဦး စွန်ပစ်ခံခဲ့ရကြောင်း မြန်မာကြယ်ဖြူ လူမှုကူညီရေးအသင်းထံ ရပ်ကွက်ရှိ ရပ်မိရပ်ဖများက အကြောင်းကြားခဲ့ပြီးနောက် အဆိုပါ လူမှုကူညီရေးအသင်းက သရုပ်ဆောင် ခိုင်နှင်းဝေအားဆက်သွယ်ကာ အကူအညီတောင်းခံခဲ့ကြောင်း သိရသည်။
သရုပ်ဆောင် ခိုင်နှင်းဝေ၏ ရင်ခွင်ရိပ်မြုံ ရင်သွေးလေးများဂေဟာတွင် မွေးကင်းစကလေးမှ အသက် ၇ နှစ်အရွယ်ရှိ ကလေးငယ် ၉၃ ဦးရှိပြီး ယခုကလေးငယ်တစ်ဦးနှင့်ဆိုလျှင် ၉၄ ဦးရှိပြီဖြစ်ကြောင်း သိရသည်။
မြင့်မြတ်အောင်မြင်
မွေးကင်းစကလေးငယ်တစ်ဦး လမ်းဘေးတွင် စွန့်ပစ်ထား၍ သရုပ်ဆောင် ခိုင်နှင်းဝေ ခေါ်ယူစောင့်ရှောက် အတွက် မှတ်ချက်များ 0 ခုရှိပါတယ်