ရန်ကုန်၊ ဇွန် ၇
ကရင်ပြည်နယ်၊ မြဝတီမြို့နယ်ရှိ မြဝတီ-ကော့ကရိတ် ဒေါနတောင်ကျော်လမ်းဟောင်းတွင် ကုန်စည်ပို့ဆောင်ရေးမော်တော်ယာဉ်များအား ဇွန် ၁ ရက်မှစတင်ပြီး မြို့ဝင်ကြေးတိုးမြင့်ကောက်ခံလာပြီးနောက် ခရီးသည်တင်ယာဥ်စီးခများ အဆမတန်မြင့်တက်လာကြောင်း မြဝတီမြို့နေ စာရေးဆရာတစ်ဦးက ပြောသည်။
“ ဒေါနတောင်ကျော်လမ်းဟောင်းက ကုန်စည်ပို့ဆောင်ရေး မော်တော်ယာဥ်ဖြတ်သန်းခမြို့ဝင်ကြေး တိုးမြင့်ကောက်ခံလာတယ်။ အဲဒီနောက်မှာ ခရီးသည်တင် မော်တော်ယာဥ်တွေက လည်း ယာဥ်စီးခတွေ အဆမတန်တိုးမြင့်တောင်းခံလာကြတယ်။ ရန်ကုန်ကနေ မြဝတီလာတာ ယာဥ်စီးခကျပ် ၂၂၀,၀၀၀ ကုန်ကျခဲ့ပါတယ်။ အရင်ကဆို ၁၃၀,၀၀၀ ပဲ ပေးရတာ။ ဒီအတိုင်းဆိုရင် ရန်ကုန်ပြန်လာဖို့ မလွယ်တော့ပါဘူး။” ဟု မြဝတီမြို့နေစာရေးဆရာတစ်ဦးက ယနေ့ခေတ်သို့ ပြောသည်။
အဆိုပါ မြဝတီ-ကောကရိတ် ဒေါနတောင်ကျော်လမ်းဟောင်းတွင် ကုန်တင်ယာဉ်များ၏ မြို့ဝင်ကြေး၊ ဂိတ်ကြေး ကုန်ကျစရိတ်များသည် သိန်းဆယ်ဂဏန်းအထက်ရှိနေကြောင်း ကုန်တင်ယာဥ်မောင်းတစ်ဦးထံက စုံစမ်းသိရှိရသည်။
ထို့ပြင် မြဝတီ-မော်လမြိုင် probox ယာဉ်ငယ်များပင် အသွားအပြန် ကျပ်သုံးသိန်းကုန်ကျပြီး၊ မြဝတီမှအသွား ခရီးသည်တင်ယာဥ်ဆောင်ခွင့်ရသော်လည်း မြဝတီသို့အပြန်တွင် ခရီးသည်နှင့် ကုန်ပစ္စည်းများ တင်ဆောင်ခွင့်မရကြောင်း probox ယာဉ်မောင်းတစ်ဦးထံက သိရသည်။
လက်ရှိ မြဝတီ-ရန်ကုန် ခရီးသည်များအား ပို့ဆောင်ရေးမော်တော်ယာဉ်ဂိတ်အချို့ ပိတ်ထားဆဲဖြစ်ကြောင်း သိရသည်။
မြင့်မြတ်အောင်မြင် ဓာတ်ပုံ – CJ
မြို့ဝင်ကြေးတိုးမြင့်ကောက်ခံလာပြီးနောက် ခရီးသည်တင်ယာဥ်စီးခများ အဆမတန် မြင့်တက်လာ ဟုဆို အတွက် မှတ်ချက်များ 0 ခုရှိပါတယ်