ရန်ကုန်၊ မေ ၂၆
မြန်မာ့ရွှေစျေးကွက်တွင် မေ ၂၅ ရက်၊ ညနေ ၄ နာရီအထိ အခေါက်ရွှေတစ်ကျပ်သားလျှင် ကျပ် ၅၁ သိန်းအထိ ပေါက်စျေးရှိခဲ့ပြီး၊ ကမ္ဘာရွှေဈေးမှာ မေ ၂၅ ရက်၊ ညနေ ၃ နာရီအထိ တစ်အောင်စလျှင် ၂,၄၅၀ ဒေါ်လာအထိ ကျဆင်းခဲ့ကြောင်း 29 စိန်ရွှေရတနာဆိုင်မှ သိရသည်။
“ ဒီနေ့ညနေ ၄ နာရီအထိ နောက်ဆုံးဈေးမှာ အခေါက်ရွှေတစ်ကျပ်သား ကျပ် ၅၁ သိန်းအထိ ပေါက်ခဲ့ပါတယ်။ ကမ္ဘာ့ရွှေက တစ်အောင်စကို ၂,၄၅၀ ဒေါ်လာအထိ ပေါက်စျေးရှိခဲ့ပါတယ်။” ဟု 29 စိန်ရွှေရတနာဆိုင်မှ တာဝန်ရှိသူတစ်ဦးက ယနေ့ခေတ်သို့ ပြောသည်။
ကမ္ဘာ့ရွှေဈေးတွင် အခေါက်ရွှေတစ်အောင်စလျှင် ၂,၄၅၀ ဒေါ်လာဝန်းကျင်အထိ ကျဆင်းခဲ့သော်လည်း မြန်မာ့ရွှေဈေးကွက်တွင် ကျပ် ၅၁ သိန်းထိ စံချိန်တင်မြင့်တက်လာခဲ့ကြောင်း သိရသည်။
မြန်မာ့ရွှေဈေးကွက်တွင် ၁၅ ပဲရည်တစ်ကျပ်သား ၄,၈၃၀,၀၀၀ ကျပ်ဖြင့် စံချိန်တင်မြင့်တက်လာခဲ့ကြောင်း သိရသည်။
ရွှေစျေးမြင့်တက်နေခြင်းကြောင့် ရန်ကုန်မြို့ရှိ ရွှေဆိုင်အများစုတွင် အခေါက်ရွှေနှင့် ရွှေတုံး၊ ရွှေခဲများကို ရောင်းဝယ်ခြင်းမပြုလုပ်ကြောင်း ကြေညာထားပြီး၊ လက်ဝတ်အထည်များကိုသာ အရောင်းအဝယ်ပြုလုပ်နေကြောင်း သိရသည်။
ပြီးခဲ့သည့်မတ်လအတွင်းမှစ၍ ပြည်တွင်းစျေးကွက်တွင် ရွှေစျေးနှုန်းများ တရိပ်ရိပ်မြင့်တက်ခဲ့ကာ မတ်လအတွင်းက အခေါက်ရွှေတစ်ကျပ်သားလျှင် ကျပ်သိန်း ၄၀ မှ ၄၄ သိန်း၊ ဧပြီလအတွင်းက ၄၅ သိန်းမှ ၄၇ သိန်းဝန်းကျင်၊ ထိုမှ ယခုမေလအတွင်း ၄၈ သိန်းမှ ကျပ်သိန်း ၅၀ ကျော်အထိ မြင့်တက်လာခြင်းဖြစ်ကြောင်း သိရသည်။
မြင့်မြတ်အောင်မြင်
ယနေ့ခေတ်
မြန်မာ့ရွှေစျေး ကမ္ဘာ့ရွှေစျေးထက် စံချိန်တင်မြင့်တက်နေ အတွက် မှတ်ချက်များ 0 ခုရှိပါတယ်