ရန်ကုန်၊ ဧပြီ ၂၁
မြန်မာနိုင်ငံတွင် လာရောက်ရင်းနှီးလုပ်ကိုင်လျက်ရှိသော အထည်ချုပ်လုပ်ငန်းရှင်များက မီးပြတ်တောက်ချိန် များလာသောကြောင့် အခက်အခဲများစွာဖြင့် ရင်ဆိုင်ကြုံတွေ့နေရပြီး ရှေ့ဆက်ရန်စဥ်းစားရမည်ဟု လှိုင်သာယာမြို့နယ်ရှိ AH Nan အထည်ချုပ်စက်ရုံပိုင်ရှင်တစ်ဦးက ယနေ့ခေတ်သို့ ပြောသည်။
“ အခုလို နွေရာသီကာလမှာ အထည်ချုပ်မှာယူသူဦးရေများတယ်။ ဒီလိုအချိန်မှာ မီးပြတ်တောက်ချိန်က ပိုမိုများပြားလာတာကြောင့် ဒီမှာဆက်ပြီး လုပ်ငန်းဆက်ရပ်တည်ဖို့ စဥ်းစားဖို့ လိုလာပါပြီ။ အခုနှစ်မှာ မီးပြတ်တောက်ချိန် အရမ်းများလာတယ်။ ဒီစက်ရုံမှာ မှီခိုလုပ်ကိုင်နေတဲ့ အထည်ချုပ်ဝန်ထမ်းတွေရဲ့ စားဝတ်နေရေးနဲ့ အလုပ်လက်မဲ့ကိစ္စတွေလဲ စဥ်းစားနေရပါတယ်။” ဟု AH Nan အထည်ချုပ်စက်ရုံပိုင်ရှင်တစ်ဦးက ယနေ့ခေတ်သို့ ပြောသည်။
အလားတူ လှိုင်သာယာမြို့နယ်၊ စက်မှုဇုန်(၁)ရှိ Pertty Fashion အထည်ချုပ်စက်ရုံတွင် စက်ရုံလုပ်သား ၁၀၀၀ ကျော်ရှိပြီး မော်တာစက်ဖြင့် အထည်ချုပ်ရခြင်းဖြစ်ရာ လျှပ်စစ်မီးအခက်အခဲကြောင့် အခက်အခဲကြုံနေရကြောင်း သိရသည်။
“ ကျွန်မတို့ ဒီစက်ရုံမှာက မော်တာချုပ်များတယ်။ အခုလို မီးပြတ်ချိန်များလာတော့ မီးစက်နှိုးလုပ်ရတယ်။ အခုလို မီးပြတ်တောက်ချိန်က များလာတော့ လုပ်ငန်းရှင်တွေအနေနဲ့လည်း လုပ်သား ၁၀၀၀ ကျော်ကို ငဲ့ရတာတစ်မျိုးနဲ့ အရှုံးကြီးရှုံးနေတယ်။ ရှေ့ဆက်ရမယ့်ကိစ္စတော့ လုပ်ငန်းရှင်တွေက ဘယ်လိုဆုံးဖြတ်မလဲ မတွေးရဲပါဘူး။” ဟု စက်မှုဇုန်(၁)ရှိ Pertty Fashion အထည်ချုပ်စက်ရုံမှ မန်နေဂျာတစ်ဦးက ယနေ့ခေတ်သို့ ပြောသည်။
ရန်ကုန်မြို့တွင် စက်သုံးဆီတစ်ပေပါလျှင် ကျပ် ၆၅၀,၀၀၀ အထိရှိနေပြီး၊ တစ်နေ့လျှင် စက်ရုံတစ်ရုံ တစ်ပေပါခွဲမှ နှစ်ပေပါအထိ မီးစက်အတွက် အသုံးပြုရလျက်ရှိကြောင်း Pertty Fashion အထည်ချုပ်စက်ရုံမှ သိရသည်။
မြန်မာနိုင်ငံတွင် တရုတ်၊ ဂျပန်နှင့် စင်ကာပူနိုင်ငံတို့က အထည်ချုပ်လုပ်ငန်းရှင်အများစု ဝင်ရောက်လုပ်ကိုင်လျက်ရှိကြောင်း သိရသည်။
လက်ရှိ ရန်ကုန်တိုင်းဒေသကြီးအပါအဝင် ပြည်နယ်နှင့် တိုင်းဒေသကြီးအချိူ့တွင် ယခု ၂၀၂၄ ခုနှစ်မှစတင်ပြီး မီးပြတ်တောက်မှု ပိုမိုများပြားလာကြောင်း သိရသည်။
မြင့်မြတ်အောင်မြင်
ဓာတ်ပုံ – CJ
မီးလာချိန်နည်းသောကြောင့် အထည်ချုပ်လုပ်ငန်းရှင်များ ရှေ့ဆက်ရန်ခက်ခဲနေ ဟုဆို အတွက် မှတ်ချက်များ 0 ခုရှိပါတယ်