ကွာလမ်လာမ်ပူ၊ ဒီဇင်ဘာ ၇
မလေးရှားနိုင်ငံ၊ ကွာလာလမ်ပူမြို့၊ အမ်ပန်းဂျာယာရှိ တိုက်ခန်းတစ်ခုကို လူဝင်မှုကြီးကြပ်ရေးဌာနက ဒီဇင်ဘာ ၆ ရက်၊ နံနက်အစောပိုင်းက ဝင်ရောက်စီးနင်းရာ တရားမဝင်မြန်မာလုပ်သား ၉၃ ဦးကို ဖမ်းဆီးရမိခဲ့ကြောင်း Bernama news သတင်းဌာန၏ဖော်ပြချက်အရ သိရသည်။
အလားတူ တရားမဝင်မြန်မာနိုင်ငံသားအပြင် အင်ဒိုနီးရှား၊ ဘင်္ဂလားဒေ့ရှ်၊ နီပေါနှင့် ပါကစ္စတန်နိုင်ငံသားများလည်း ဖမ်းဆီးရမိခဲ့ကြောင်း မလေးရှားလူဝင်မှုကြီးကြပ်ရေး ညွှန်ကြားရေးမှူးချုပ်၏ ပြောဆိုချက်အရ သိရသည်။
“ တရားမဝင်ရွှေ့ပြောင်းသူတွေနဲ့ ပတ်သက်ပြီး တိုင်ကြားထားတဲ့လူဦးရေ ၁၈၉ ဦးကို လူဝင်မှုကြီးကြပ်ရေး ညွှန်ကြားရေးမှူးဌာနက စစ်ဆေးခဲ့ပါတယ်။ တချို့က စစ်ဆင်ရေးအတွင်းမှာ ထွက်ပြေးဖို့ကြိုးစားကြပါတယ်။ မြန်မာနိုင်ငံသားက ၉၃ ဦးပါ။” ဟု မလေးရှားနိုင်ငံရောက် မြန်မာနိုင်ငံသားများ ကူညီစောင့်ရှောက်ရေးအဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
အဆိုပါ ဖမ်းဆီးရမိသူများကို ၁၉၅၉-၆၃ လူဝင်မှုကြီးကြပ်ရေးအက်ဥပဒေ၊ ၁၉၆၆ နိုင်ငံကူးလက်မှတ်အက်ဥပဒေ၊ ၁၉၆၃ လူဝင်မှုကြီးကြပ်ရေးစည်းမျဉ်းများဥပဒေများကို ဖောက်ဖျက်မှုနှင့် ဆက်လက်စုံစမ်းအရေးယူရန် ဆောင်ရွက်နေကြောင်း သိရသည်။
မြင့်မြတ်အောင်မြင်
ဓာတ်ပုံ – Bernama news
မလေးရှားတွင် တရားမဝင်မြန်မာလုပ်သား ၉၃ ဦး ဖမ်းဆီးခံရ အတွက် မှတ်ချက်များ 0 ခုရှိပါတယ်