ရန်ကုန်၊ မေ ၁၈
မန္တလေးတိုင်းဒေသကြီး၊ မဟာအောင်မြေမြို့နယ်၊ စိန်ပန်းရပ်ကွက်၊ ၄၁ လမ်းနှင့် ၈၉ လမ်းထောင့်ရှိ အဘယာရာမ ရွှေဂူကျောင်းတိုက်ရှိ ငလျင်ဘေးသင့်များနေထိုင်သည့် ယာယီရွက်ဖျင်တဲပေါ်သို့ မေ ၁၈ ရက်၊ နံနက် ၀၀ နာရီ ၃၀ မိနစ်က မိုးသည်းစွာရွာသွန်းမှုကြောင့် လုံးပတ် ၅ ပေခန့်၊ အရှည် ၄၀ ပေခန့်ရှိ နှစ်ချို့ကုက္ကိုလ်ပင်သည် အပင်မြစ်ခြေမှလန်၍လဲကျရာ သားအဖနှစ်ဦးသေဆုံးခဲ့ကြောင်း သိရသည်။
အဘယာရာမရွှေဂူကျောင်းတိုက်ရှိ ငလျင်ဘေးသင့် ယာယီကယ်ဆယ်ရေးရွက်ဖျင်တဲနေ လေးနှစ်ဝန်းကျင်ကလေးငယ်တစ်ဦးနှင့် အသက် ၄၀ နှစ်(ခန့်မှန်း)အရွယ်ဖခင်တို့ နေရာ၌ သေဆုံးသွားကြောင်း မြန်မာနိုင်ငံမီးသတ်တပ်ဖွဲ့က မေ ၁၈ ရက်နေ့စွဲဖြင့် သတင်းထုတ်ပြန်သည်။
“ နှစ်ချို့ကုက္ကိုလ်ပင်လဲကျလို့ သားအဖနှစ်ဦး နေရာမှာသေဆုံးသွားကြပါတယ်။ မန္တလေးမှာ ငလျင်လှုပ်ခတ်မှုကြောင့် နေရပ်ရွေ့ပြောင်းပြီး ယာယီနေထိုင်တဲ့ ရွက်ဖျင်တဲထဲမှာနေသူပါ။ ယခင်ရက်ပိုင်းကလဲ မန္တလေးမှာ မိုးလေသည်းထန်ထားပါတယ်။ အဲဒီရက်ပိုင်းကလဲ သစ်ကိုင်းတွေကျိုးကျပါသေးတယ်။ မိုးကြီးရေလျှံပြီး မြေပျော့နေတာ။ ငလျင်လှုပ်ခတ်ထားတာနဲ့ မိုးရွာတာကြောင့် နှစ်ချို့သစ်ပင်လဲသွားတာ” ဟု မြန်မာနိုင်ငံမီးသတ်တပ်ဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
အဆိုပါ နှစ်ချို့ကုက္ကိုလ်ပင်လဲကျပြီး ယာယီရွက်ဖျင်တဲအောက်ပိမိသူ သားအဖနှစ်ဦးအား ကယ်ဆယ်ရေးအဖွဲ့များက လဲကျနေသည့်သစ်ပင်ကို ရှင်းလင်းပြီး ရုပ်အလောင်းကို ကယ်ထုတ်ခဲ့ကြောင်း သိရသည်။
ယင်းဖြစ်စဉ်ကြောင့် သေဆုံးသူဖခင်ဖြစ်သူနှင့် သမီးဖြစ်သူတို့၏ ရုပ်အလောင်းများကို မိုဃ်းကောင်းရသ လူမှုကူညီရေးအသင်း၏ သူနာတင်ယာဉ်ဖြင့် မန္တလေးပြည်သူ့ဆေးရုံးကြီးသို့ ကူညီပို့ဆောင်ပေးခဲ့ကြောင်း သိရသည်။
မြင့်မြတ်အောင်မြင်
ဓာတ်ပုံ – MFSD နှင့် မဏီစလ
ယနေ့ခေတ်
မန္တလေးတွင် ယာယီရွက်ဖျင်တဲပေါ် ကုက္ကိုလ်ပင်လဲကျ သားအဖနှစ်ဦးသေဆုံး အတွက် မှတ်ချက်များ 0 ခုရှိပါတယ်