ရန်ကုန်၊ ဇန်နဝါရီ ၁၁
မန္တလေးတိုင်းဒေသကြီး၊ ချမ်းအေးသာစံမြို့နယ်၊ ပတ်ကုန်းပျော်ဘွယ်ရပ်ကွက်၊ ၆၈ လမ်းနှင့် ၆၉ လမ်းကြား၊ ၂၉ လမ်းနှင့် လမ်း ၃၀ ကြားရှိ မန္တလေးတိုင်းအကူရဲတပ်ဖွဲ့ ဝန်ထမ်းလိုင်းခန်းတွင် ဇန်နဝါရီ ၁၀ ရက်၊ နံနက် ၉ နာရီ ၅၀ မိနစ်က မီးလောင်မှုဖြစ်ပွားခဲ့ကြောင်း သိရသည်။
တိုင်းအကူရဲတက်ဖွဲ့ ဝန်ထမ်းလိုင်းခန်းက လေးခန်းတွဲသွပ်မိုး၊ ပျဥ်ကာနှစ်ဆောင်၊ အခန်းရှစ်ခန်းစလုံး မီးလောင်ပျက်စီးခဲ့ကြောင်း သိရသည်။
“ ဝန်ထမ်းလိုင်းခန်းမှာ မီးလောင်မှုဖြစ်တာ မှန်ပါတယ်။ ပျက်စီးဆုံးရှုံးမှုများခဲ့ပါတယ်။ မီးလောင်တဲ့ဖြစ်စဥ်ကိုတော့ စိစစ်နေဆဲပါ။ နာရီဝက်ကြာ ငြိမ်းသတ်ခဲ့ရပါတယ်။” ဟု မန္တလေးမီးသတ်ဦးစီးဌာနမှ တာဝန်ရှိသူတစ်ဦးက ယနေ့ခေတ်သို့ ပြောသည်။
မီးလောင်မှုဖြစ်စဥ်ကို မီးသတ်ဦးစီးဌာနက Level-1 အဆင့်သတ်မှတ်ခဲ့ပြီး မီးလောင်မှုဖြစ်ပွားရသည့် အကြောင်းအရင်းအပြင် ပျက်စီးဆုံးရှုံးမှုတန်ဖိုးကို စိစစ်တွက်ချက်နေဆဲဖြစ်ကြောင်း သိရသည်။
#မြင့်မြတ်အောင်မြင်
ဓာတ်ပုံ – CJ
#ယနေ့ခေတ်
မန္တလေးတိုင်းအကူရဲတပ်ဖွဲ့ ဝန်ထမ်းလိုင်းခန်း မီးလောင် အတွက် မှတ်ချက်များ 0 ခုရှိပါတယ်