ရန်ကုန်၊ မေ ၂၉
မွန်ပြည်နယ်၊ ဘီးလင်းမြို့နယ်နှင့် သထုံမြို့ကြား ရန်ကုန်-မော်လမြိုင်ကားလမ်းမကြီးရှိ မစောတံတားမှဖြတ်သန်းရန် စောင့်ဆိုင်းနေသူများအား မေ ၂၈ ရက်၊ နံနက် ၁၀ နာရီက ဘီးလင်းမြို့ခံ စေတနာရှင်ကစုပေါင်းပြီး ထမင်းနှင့် ရေသန့်ဗူးအပါအဝင် အစားအစားအချို့ကို လှူဒါန်းဝေငှပေးခဲ့ကြောင်း သိရသည်။
“ မစောတံတားရဲ့ မြေသားလမ်းလွဲက နာရီဝက်ခြား မောင်းနှင်ခွင့်ပေးထားရင်းနဲ့ မိုးအရမ်းရွာလို့ မြေသားပျော့အိလာတယ်။ ဒါကြောင့် ပြုပြင်ရေးလုပ်ငန်းတွေ ပြန်လည်ဆောင်ရွက်နေရပါတယ်။ ဒီလိုအချိန်မှာ ကားတွေဖြတ်သန်းခွင့် ပိတ်ထားရပါတယ်။ ဖြတ်သန်းခွင့် မပေးတဲ့အချိန် ခရီးသည်တွေနဲ့ ကုန်သည်တွေ အစားအသောက်အခက်အခဲဖြစ်လို့ ဒေသခံ စေတနာရှင်တွေစုပေါင်းပြီး ထမင်းနဲ့ ရေသန့်ဗူးတွေ လှူဒါန်းပေးတာပါ။” ဟု ဘီးလင်းလမ်းတံတားဆောက်လုပ်ရေးမှ တာဝန်ရှိသူတစ်ဦးက ယနေ့ခေတ်သို့ ပြောသည်။
မစောတံတား လမ်းလွဲမြေသားများ မိုးရွာသွန်းမှုကြောင့် မြေသားများပျော့အိလာခြင်းကြောင့် သက်ဆိုင်ရာလမ်းတံတားအဖွဲ့က ခေတ္တပြုပြင်ရေးဆောင်ရွက်နေကြောင်း သိရသည်။
ထိုသို့ လမ်းလွဲမြေသားမှ ဖြတ်သန်းရန်စောင့်ဆိုင်းနေရသည့် ကားသမားများနှင့် ခရီးသွားပြည်သူများကို ဘီးလင်းမြို့အခြေစိုက် ရှင်သန်ခြင်းနှင့် နာရေးကူညီမှုအသင်း၊ နှလုံးလှ လူ ငယ်ပညာရေးပရဟိတအသင်း၊ စေတနာရှင်များကစုပေါင်းပြီး အစားအသောက်များ လှူဒါန်းဝေငှပေးခဲ့ခြင်းဖြစ်ကြောင်း သိရသည်။
မြင့်မြတ်အောင်မြင်
ဓာတ်ပုံ – CJ
ဘီးလင်းမြို့တွင် လမ်းပိတ်ဆို့မှုကြောင့် စောင့်ဆိုင်းနေသူများကို မြို့ခံများက ထမင်းနှင့် ရေသန့်ဗူးများလှူဒါန်း အတွက် မှတ်ချက်များ 0 ခုရှိပါတယ်