ရန်ကုန်၊ ဇန်နဝါရီ ၂၈
ဟားခါးမြို့နယ်တွင် ယမန်နေ့ နံနက်ပိုင်းက ဘိလပ်မြေသယ်ယာဥ်တစ်စီး ဘရိတ်ပေါက်ကာ ချောက်အတွင်းတိမ်းမှောက်ခဲ့ပြီး ယာဥ်မောင်းသေဆုံးခဲ့ကြောင်း သိရသည်။
ချင်းပြည်နယ်၊ ဟားခါးမြို့၊ ဂန့်ဂေါ-ဟားခါးလမ်း၊ မိုင်တိုင်အမှတ်(၃/၁)နှင့် (၃/၂)ကြားတွင် ဇန်နဝါရီ ၂၇ ရက်၊ နံနက် ၁၀ နာရီခန့်က ဘိလပ်မြေသယ်ယာဉ်တစ်စီး ဘရိတ်ပေါက်ကာ အရှိန်မထိန်းနိုင်ဘဲ ပေ ၄၀ ခန့်အနက်ရှိ ချောက်အတွင်းသို့ တိမ်းမှောက်ပြီး ယာဥ်မောင်းသေဆုံးခဲ့ကြောင်း မြန်မာနိုင်ငံမီးသတ်တပ်ဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
“ ဘိလပ်မြေသယ်ဆောင်လာတဲ့ ကုန်ကားတစ်စီး ပေ ၄၀ ခန့်အနက်ရှိတဲ့ ချောက်အတွင်းကို ဘရိတ်ပေါက်ပြီး တိမ်းမှောက်သွားပါတယ်။ ယာဥ်မောင်းနဲ့ ယာဥ်နောက်လိုက်ကို ချောက်အတွင်းက ကယ်ဆယ်ထုတ်ပေးနိုင်ခဲ့ပေမယ့် ယာဥ်မောင်းက သေဆုံးလျက်ပဲ ပြန်တွေ့ရှိခဲ့ပါတယ်။” ဟု မြန်မာနိုင်ငံမီးသတ်တပ်ဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြော သည်။
အဆိုပါ မိုင်တိုင်အမှတ်(၃/၁)နှင့် (၃/၂)ကြားတွင် အရှိမထိန်းနိုင်ဘဲ ဘရိတ်ပေါက်ကာ ချောက်အတွင်းတိမ်းမှောက်မှုဖြစ်စဉ်ကြောင့် ယာဉ်ပေါ်ပါ ယာဉ်မောင်းအမျိုးသားတစ်ဦး၊ ယာဉ်နောက်လိုက်အမျိုးသားတစ်ဦးတို့အနက် ယာဉ်မောင်းအမျိုးသား သေဆုံးလျက်သာ ပြန်လည်တွေ့ရှိခဲ့ကြောင်း သိရသည်။
ယာဉ်တိမ်းမှောက်မှုကြောင့် သေဆုံးသူ၏ရုပ်အလောင်းကို မီးသတ်တပ်ဖွဲ့ပိုင် သူနာတင်ယာဉ်ဖြင့် ဟားခါးမြို့ပြည်သူ့ဆေးရုံသို့ ကူညီပို့ဆောင်ပေးခဲ့ကြောင်း သိရသည်။
မြင့်မြတ်အောင်မြင်ဓါတ်ပုံ – မြန်မာနိုင်ငံ မီးသတ်တပ်ဖွဲ့
ဘိလပ်မြေသယ်ယာဥ်တစ်စီး ဘရိတ်ပေါက်ကာ ချောက်အတွင်းတိမ်းမှောက် ယာဥ်မောင်းသေဆုံး အတွက် မှတ်ချက်များ 0 ခုရှိပါတယ်