ရန်ကုန်၊ မတ် ၁၁
ပြည်ပရောက် မြန်မာရွှေ့ပြောင်းလုပ်သားများ၏ ပြန်ပို့ငွေအထောက်အထား မတင်ပြနိုင်သော အေဂျင်စီ ၄၀ ခုကို မတ် ၁၁ ရက်၊ နောက်ဆုံးထားပြီးမတင်ပြနိုင်လျှင် အလုပ်ခေါ်စာ(Demand Letter) အသစ်တင်ပြခွင့်ကိုဆိုင်းငံ့ပြီး ဒဏ်ကြေးပါပေးဆောင်ရမှာဖြစ်ကြောင်း အလုပ်သမားဝန်ကြီးဌာန၏ ထုတ်ပြန်ချက်အရ သိရသည်။
အလားတူ ၂၀၂၄ ခုနှစ်၊ စက်တင်ဘာလတွင် ပြည်ပရောက် မြန်မာရွှေ့ပြောင်းလုပ်သားများ၏ ပြန်ပို့ငွေစာရင်း မပြနိုင်သော အေဂျင်စီ ၁၄၆ ခုကို ပိတ်ဆို့အရေးယူမှုများ ပြုလုပ်ခဲ့ကြောင်း သိရသည်။
“ ပြည်ပစေလွှတ်တဲ့ အလုပ်သမားစေအပေါ်မှာ မူဝါဒတွေ မျိုးစုံပြောင်းလဲနေတာကြောင့် အခက်အခဲတွေအများကြီးနဲ့ တွေ့ကြုံနေရပါတယ်။ အေဂျင်စီတွေ အကုန်လုံးနီးပါးက အ ဆင်မပြေတော့ပါဘူး။ အလုပ်သမားဝန်ကြီးတွေ အသစ်ပြောင်းလဲလာတိုင်းလည်း မူဝါဒတွေက ပြောင်းလဲလာပါတယ်။ တစ်ယောက်တစ်မူလိုကို ဖြစ်နေတာပါ။” ဟု ပြည်ပပို့ဆောင်ရေးအေဂျင်စီတစ်ခုက ယနေ့ခေတ်သို့ ပြောသည်။
၂၀၂၅ ခုနှစ်၊ ဖေဖော်ဝါရီလ ၃ ရက်တွင် အခွန်မဆောင်သည့်အတွက် ပြည်ပအလုပ်အကိုင်ရှာဖွေရေး အေဂျင်စီ ၁၂၃ ခုကို လုပ်ငန်းလုပ်ကိုင်ခွင့် ဆိုင်းငံ့ခံခဲ့ရကြောင်း သိရသည်။
ပြည်ပရောက် မြန်မာရွှေ့ပြောင်းလုပ်သားများ၏ လုပ်ခလစာအနက်မှ ၂၅ ရာခိုင်နှုန်းကို တစ်လချင်း(သို့မဟုတ်) သုံးလတစ်ကြိမ် တရားဝင်ဘဏ်စနစ်မှတဆင့်လွှဲပို့ရန် ညွှန်ကြားထားပြီး မလိုက်နာလျှင် အဆိုပါအလုပ်သမားကို ပြည်ပထွက်ခွင့် သုံးနှစ်ပိတ်မည်ဖြစ်ကြောင်း အလုပ်သမားဝန်ကြီးဌာန၏ ထုတ်ပြန်ချက်အရ သိရသည်။
#မြင့်မြတ်အောင်မြင်
ဓာတ်ပုံ – Myanmar Embassy, Seoul
ယနေ့ခေတ်
ပြည်ပရောက် မြန်မာရွှေ့ပြောင်းလုပ်သားများ၏ ပြန်ပို့ငွေမတင်ပြနိုင်သော အေဂျင်စီ ၄၀ ကို အရေးယူမည် အတွက် မှတ်ချက်များ 0 ခုရှိပါတယ်