ရန်ကုန်၊ မတ် ၁၃
ရန်ကုန်တိုင်း၊ ရွှေပြည်သာမြို့နယ်၊ ဘုံရှည်ကုန်းလမ်း၊ အမှတ် (၂၅) ရပ်ကွက်တွင် မတ် ၁၂ ရက်၊ ညနေ ၅ နာရီခွဲက ငါးနှစ်အရွယ် မိန်းကလေးတစ်ဦး ပျောက်ဆုံးမှုဖြစ်ပွားခဲ့ကြောင်း We Love Care လူမှုဘဝစောင့်ရှောက်ရေး ပရဟိတအသင်းမှ တာဝန်ရှိသူတစ်ဦးက ယနေ့ခေတ်သို့ ပြောသည်။
အဆိုပါ ငါးနှစ်အရွယ် မိန်းကလေးတစ်ဦး ပျောက်ဆုံးနေမှုနှင့် ပတ်သက်၍ We Love Care လူမှုဘဝစောင့်ရှောက်ရေး ပရဟိတအသင်းက ပူးပေါင်းရှာဖွေပေးခဲ့ရာတွင် မတ် ၁၃ ရက်(ယနေ့) နံနက် ၁၀ နာရီက ဒညင်းကုန်းလမ်းဆုံရှိ တောင်းရမ်းစားသောက်သူအဖွဲ့အနီးတွင် ပြန်လည်တွေ့ရှိခဲ့ကြောင်း သိရသည်။
“ ကလေးက သူ့အဖေနဲ့ ရွှေပြည်သာကွေ့ပန်းခြံမှာ ဆော့ကစားရင်း ပျောက်ဆုံးသွားတာပါ။ ဒီကလေးမလေးရဲ့အဖေက ဝယ်စရာတစ်ခု ပြေးဝယ်ရင်း ပျောက်ဆုံးသွားတာပါ။ ဒါနဲ့ ကလေးပျောက်ဆုံးနေမှုနဲ့ပတ်သက်ပြီး ဆက်သွယ်အကူအညီတောင်းခံလာတယ်။ အနီးပတ်ဝန်းကျင်က ကလေးတွေ့ရှိသူတချို့က ဒညင်းကုန်းလမ်းဆုံက တောင်းရမ်းစားသောက်သူအဖွဲ့နားမှာတွေ့ရှိတယ် ပြောဆိုချက်အရ သွားရောက်ရှာဖွေရင်း ပြန်လည်တွေ့ရှိခဲ့ပါတယ်။” ဟု We Love Care လူမှုဘဝစောင့်ရှောက်ရေး ပရဟိတအသင်းမှ တာဝန်ရှိသူတစ်ဦးက ယနေ့ခေတ်သို့ ပြောသည်။
ထိုသို့ တွေ့ရှိချက်နှင့် စပ်လျဥ်းပြီး ကလေးအားတွေ့ရှိသူများ၏ ပြောပြချက်အရ တောင်းရမ်းစားသောက်သူအဖွဲ့တစ်ခုမှ ခေါ်ယူသွားကြောင်း သတင်းရရှိသဖြင့် တောင်းရမ်းသူအဖွဲ့များရှိရာ လိုက်လံရှာဖွေရင်း ပြန်လည်တွေ့ရှိခဲ့ကြောင်း သိရသည်။
အသက်ငါးနှစ်အရွယ် မိန်းကလေးပျောက်ဆုံးမှုနှင့် ပတ်သက်၍ သက်ဆိုင်ရာတာဝန်ရှိသူများ၏ CCTV မှတ်တမ်းအားကြည့်ရှု၍ ပူးပေါင်းဆောင်ရွက်ခဲ့ကြောင်း We Love Care လူမှုဘဝစောင့်ရှောက်ရေး ပရဟိတအသင်းမှ တာဝန်ရှိသူတစ်ဦးက ယနေ့ခေတ်သို့ ပြောသည်။
မြင့်မြတ်အောင်မြင်ဓါတ်ပုံ – CJ
ပျောက်ဆုံးနေသည့် ငါးနှစ်အရွယ် ကလေးငယ်တစ်ဦး ဒညင်းကုန်းလမ်းဆုံရှိ တောင်းစားနေသူများအဖွဲ့အနီးတွင် ပြန်တွေ့ အတွက် မှတ်ချက်များ 0 ခုရှိပါတယ်