ရန်ကုန်၊ ဇန်နဝါရီ ၃၁
ပုဂံရှေးဟောင်းမြို့တော်ရှိ ကမ္ဘောဇဘဏ်ကို ယနေ့ နေ့လည်ပိုင်းတွင် အမည်မသိလူတစ်စုက ကျပ်သိန်း ၃၀၀၀ ကျော် ဓါးပြတိုက်သွားကြောင်း သိရသည်။
မန္တလေးတိုင်းဒေသကြီး၊ ပုဂံရှေးဟောင်းမြို့တော်ရှိ ကမ္ဘောဇဘဏ်တွင် ဇန်နဝါရီ ၃၁ ရက်၊ မွန်းတည့် ၁၂ နာရီက ကျပ်သိန်း ၃၀၀၀ ကျော်အား အမည်မသိလူတစ်စုက ဝင်ရောက်ဓါးပြတိုက်ခံသကြောင်း ပုဂံရှေးဟောင်းမြို့တော် အုပ်ချုပ်ရေးအဖွဲ့က တာဝန်ရှိသူတစ်ဦးက ယနေ့ခေတ်သို့ ပြောသည်။
“ အမည်မသိလူတစ်စုက ကမ္ဘောဇဘဏ်ထဲကို ငွေထုတ်မယ့်သူ အယောင်ဆောင်ပြီး ဝင်လာကြတယ်။ ဘဏ်ထဲရောက်တော့ ငွေကိုင်ကောင်တာမှာရှိတဲ့ ဝန်ထမ်းတွေကို သေနတ်တွေနဲ့ထောက်ပြီး ကျပ်သိန်း ၃၀၀၀ ကျော်လောက်ကို ပီရံအိတ်တွေနဲ့ ထုတ်ပိုးသယ်ဆောင်သွားကြတာ စီစီတီဗွီမှတ်တမ်းအရ တွေ့မြင်ခဲ့ရပါတယ်။ သက်ဆိုင်ရာက အမြန်ဆုံး ဖမ်း ဆီးရမိရေးအတွက် ဆောင်ရွက်နေပါတယ်” ဟု ပုဂံရှေးဟောင်းမြို့တော် အုပ်ချုပ်ရေးအဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
အဆိုပါ ပုဂံရှေးဟောင်းမြို့တော်ရှိ ကမ္ဘောဇဘဏ် ဓါးပြတိုက်ခံရမှုဖြစ်နှင့် ပတ်သက်၍ သက်ဆိုင်ရာမှ အမြန်ဆုံး ဖမ်းဆီးရမိရေးအတွက် စုံစမ်းနေဆဲဖြစ်ကြောင်း သိရသည်။
မြင့်မြတ်အောင်မြင်
ပုဂံရှေးဟောင်းမြို့တော်ရှိ ကမ္ဘောဇဘဏ် ကျပ်သိန်း ၃၀၀၀ ကျော် ဓါးပြတိုက်ခံရ အတွက် မှတ်ချက်များ 0 ခုရှိပါတယ်