ရန်ကုန်၊ ဇွန် ၁၃
ရန်ကုန်တိုင်းဒေသကြီး၊ လှိုင်သာယာမြို့နယ်၊ ပန်းလှိုင်ဂေါက်ကွင်းအနီး၊ ရန်ကုန်မြစ်အတွင်းတွင် ဇွန် ၁၂ ရက်၊ မွန်းလွဲ ၂ နာရီ ၃၇ မိနစ်က စက်လှေတစ်စီး မီးလောင်မှုဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့ထံမှ သိရသည်။
ထူးထက်အောင် (၅၀၄) ငါးဖမ်းစက်လှေသည် ပန်းလှိုင်ဂေါက်ကွင်းအနီးရှိ ရန်ကုန်မြစ်အတွင်း ကမ်းကပ်ရန်သွားနေချိန် အင်ဂျင်အပူလွန်ကဲပြီး မီးလောင်မှုဖြစ်ပွားခဲ့ကြောင်း သိရ သည်။

“ မွန်းလွဲ ၂ နာရီခွဲပြီးကတည်းက ရန်ကုန်မြစ်အတွင်းမှာ စက်လှေမီးလောင်တာပါ။ စက်လှေတစ်စီးလုံး မီးလောင်ကျွမ်းမှုဖြစ်ပွားခဲ့ပါတယ်။ လူအချို့ထိခိုက်မှုရှိခဲ့ပါတယ်။ လေးနာရီခန့်ကြာမှ မီးငြိမ်းသတ်နိုင်ခဲ့ပါတယ်။” ဟု မြန်မာနိုင်ငံမီးသတ်တပ်ဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
ထူးထက်အောင် (၅၀၄) ငါးဖမ်းစက်လှေ မီးလောင်ကျွမ်းမှုကို ညနေ ၆ နာရီ ၃၉ မိနစ်တွင် အပြီးငြိမ်းသတ်နိုင်ခဲ့ပြီး မီးလောင်ကျွမ်းမှုတွင် ပျက်စီးဆုံးရှုံးမှုနှင့် လူထိခိုက်မှု အသေးစိတ်ကို မြန်မာနိုငိငံမီးသတ်တပ်ဖွဲ့က စိစစ်နေဆဲဖြစ်ကြောင်း သိရသည်။
မြင့်မြတ်အောင်မြင်
ဓာတ်ပုံ – CJ
ပန်းလှိုင်ဂေါက်ကွင်းအနီး ရန်ကုန်မြစ်အတွင်း စက်လှေတစ်စီးမီးလောင် အတွက် မှတ်ချက်များ 0 ခုရှိပါတယ်