ရန်ကုန်၊ မေ ၅
ရန်ကုန်တိုင်းဒေသကြီး၊ ဗိုလ်တထောင်မြို့နယ်၊ နန်းသီတာဆိပ်ကမ်း၊ ဗောတံတားအမှတ်(၂)တွင် မေ ၃ ရက်၊ ည ၈ နာရီ ၁၀ မိနစ်က အိန္ဒိယနိုင်ငံသားတစ်ဦး မြစ်ရေထဲပြုတ်ကျကာ ပျောက်ဆုံးနေကြောင်း အိန္ဒိယသံရုံး၏ မေ ၄ ရက်၊ နေ့စွဲဖြင့်ထုတ်ပြန်ချက်အရ သိရသည်။
အိန္ဒိယနိုင်ငံသားသုံးဦးသည် မေ ၃ ရက်၊ ညနေ ၆ နာရီခွဲက City Star Hotel မှတစ်ဆင့် နန်းသီတာဆိပ်ကမ်းရှိ ရွှေဘဲစားသောက်ဆိုင်၌ ညစာစားသောက်ပြီး ခြေလျင်လမ်းလျှောက်ပြန်လာစဉ် အိန္ဒိယနိုင်ငံသား Abdul Kabeer (၃၉)နှစ်၊ Pass XB 701310 သည် ဗောတံတားအမှတ်(၁)နှင့် အမှတ်(၂)ကြားတွင် မြစ်ရေထဲသို့ ပြုတ်ကျပျောက်ဆုံးနေကြောင်း သိရ သည်။
“ နန်းသီတာဆိပ်ကမ်းမှာရှိတဲ့ ရွှေဘဲစားသောက်ဆိုင်ကို ခြေလျင်လမ်းလျှောက်သွားခဲ့ကြတယ်။ အဲဒီရွှေဘဲကနေ စားသောက်ပြီးနောက်မှာ အိန္ဒိယနိုင်ငံသားသုံးဦး လမ်းလျှောက်ပြန်ချိန် ဗောတံတားအမှတ်(၁)နဲ့ အမှတ်(၂)ကြားမှာ အိန္ဒိယနိုင်ငံသား Abdul Kabeer အသက်(၃၉)နှစ်က ရေထဲပြုတ်ကျပြီး ပျောက်ဆုံးနေပါတယ်။ ကယ်ဆယ်ရေးအဖွဲ့တွေ ဆက်လက်ရှာဖွေနေဆဲပါ။ အခုထိမတွေ့ရှိသေးပါဘူး” ဟု ရန်ကုန်မြို့အခြေစိုက် အိန္ဒိယသံရုံးမှ တာဝန်ရှိသူတစ်ဦးက ယနေ့ခေတ်သို့ ပြောသည်။
အိန္ဒိယနိုင်ငံသားသုံးဦးသည် အိန္ဒိယနိုင်ငံမှ MAI လေယာဥ်ဖြင့် ရန်ကုန်လေဆိပ်သို့ မေ ၂ ရက်၊ မွန်းလွဲ ၁ နာရီ ၄၅ မိနစ်တွင် ရောက်ရှိခဲ့ပြီးနောက် ကျောက်တံတားမြို့နယ် City Star Hotel အခန်း(၉၀၆)၌ တည်းခိုနေထိုင်ကြကြောင်း သိရသည်။
အဆိုပါ အိန္ဒိယနိုင်ငံသားသုံးဦးသည် မေ ၉ ရက်တွင် အိန္ဒိယနိုင်ငံ၊ ချန်နိုင်းမြို့သို့ ပြန်မည်သူများဖြစ်ပြီး (အထည်ရောင်းလုပ်ငန်းလုပ်ကိုင်သူများ)ဖြစ်ကြောင်း မြန်မာနိုင်ငံရှိ အိန္ဒိယသံရုံး၏ ပြောဆိုချက်အရ သိရသည်။
မြစ်ရေအတွင်းသို့ ပြုတ်ကျပျောက်ဆုံးနေသည့် အိန္ဒိယနိုင်ငံသားကို ကျောက်တံတားမြို့နယ် မီးသတ်ဦးစီးဌာနနှင့် မြန်မာ့ဆိပ်ကမ်းအာဏာပိုင်တို့က ရှာဖွေကယ်ဆယ်ရေးလုပ်ငန်းများ ဆောင်ရွက်လျက်ရှိကြောင်း သိရသည်။
မြင့်မြတ်အောင်မြင်
ဓာတ်ပုံ – မြန်မာနိုင်ငံဆိုင်ရာ အိန္ဒိယသံရုံး
#ယနေ့ခေတ်
နန်းသီတာဆိပ်ကမ်း ဗောတံတားအမှတ်(၂)တွင် အိန္ဒိယနိုင်ငံသားတစ်ဦး မြစ်ထဲပြုတ်ကျ ပျောက်ဆုံးနေ အတွက် မှတ်ချက်များ 0 ခုရှိပါတယ်