ဘန်ကောက်၊ ဇွန် ၉
ထိုင်းနိုင်ငံ၊ Muang Khon Kaen ခရိုင်၊ အစိုးရဆေးရုံတွင် ဇွန် ၇ ရက်၊ ဒေသစံတော်ချိန် နံနက် ၈ နာရီက ကျောဘက်အကြိတ် ခွဲစိတ်ကုသမှုခံယူနေသည့် မြန်မာရွှေ့ပြောင်းလုပ်သားတစ်ဦးကို ထိုင်းရဲအရာရှိ (ရဲတပ်ကြပ်)တစ်ဦးက သေနတ်ဖြင့်ပစ်ခတ်ခြင်းကြောင့် နေရာ၌သေဆုံးသွားကြောင်း Bangkok Post သတင်းဌာနတွင်ဖော်ပြချက်အရ သိရသည်။
“ မြန်မာရွှေ့ပြောင်းလုပ်သားတစ်ဦးက Muang Khon Kaen ခရိုင်၊ အစိုးရဆေးရုံမှာ ကျောဘက်အကြိတ် ခွဲစိတ်ကုသမှုခံယူနေသူပါ။ သေနတ်နဲ့ပစ်ခတ်ခဲ့တဲ့ ထိုင်းရဲအရာရှိကိုယ်တိုင်က မြန်မာလူငယ်ကို ပစ်ခတ်သတ်ခဲ့တာ ဝန်ခံထားပါတယ်။ ဒီဆေးရုံမှာပဲ ဆေးဝါးကုသမှုခံယူနေတဲ့ သူရဲ့ဖခင်ဘေးကုတင်မှာရှိနေတဲ့ မြန်မာလူငယ်နဲ့ပတ်သက်ပြီး စိတ်အနှောင့်အ ယှက်ဖြစ်နေတာ သိရတာကြောင့် ပစ်သတ်ခဲ့တာလို့ ထွက်ဆိုထားပါတယ်။” ဟု ထိုင်းရောက် မြန်မာရွှေ့ပြောင်းလုပ်သားကူညီစောင့်ရှောက်ရေးအဖွဲ့ တာဝန်ခံတစ်ဦးက ယနေ့ခေတ်သို့ ပြောသည်။
အဆိုပါ မြန်မာရွှေ့ပြောင်းလုပ်သားအား အစိုးရဆေးရုံတွင် သေနတ်ဖြင့်ပစ်ခတ်ခဲ့သူ ထိုင်းရဲအရာရှိ (ရဲတပ်ကြပ်)ကို ဇွန် ၈ ရက်က ဖမ်းဆီးရမိခဲ့ကြောင်း အာဏာပိုင်များက Bangkok Post သတင်းဌာနသို့ ပြောသည်၊
သေနတ်ဖြင့် ပစ်ခတ်သတ်ခံရသူ မြန်မာရွှေ့ပြောင်းလုပ်သားသည် အသက် ၂၉ နှစ်အရွယ်ဖြစ်ပြီး၊ Muang Khon Kaen ခရိုင်၊ အစိုးရဆေးရုံ၌ ဆေးဝါးကုသမှုခံယူနေသူဖြစ်ကြောင်း သိရသည်။
မြန်မာရွှေ့ပြောင်းလုပ်သားအား သေနတ်ဖြင့်ပစ်ခတ်ခဲ့သူ အသက် ၃၄ နှစ်အရွယ် ထိုင်းရဲတပ်ကြပ် Veeraphong Buayen က Khon Kaen ခရိုင် Phra Yuen ရဲစခန်းတွင် တာဝန်ထမ်းဆာင်နေသူတစ်ဦးဖြစ်ပြီး၊ ဇွန် ၈ ရက်၊ ဒေသစံတော်ချိန် နံနက် ၉ နာရီခွဲက Khon Kaen ရဲစခန်းတွင် ကိုယ်တိုင်လာရောက်အဖမ်းခံခဲ့ကြောင်း Bangkok Post သတင်းဌာန၏ ဖော်ပြချက်အရ သိရသည်။
မြင့်မြတ်အောင်မြင် ဓာတ်ပုံ – Bangkok Post
ထိုင်းအစိုးရဆေးရုံတွင် မြန်မာရွှေ့ပြောင်းလုပ်သားတစ်ဦး သေနတ်ဖြင့်ပစ်သတ်ခံရ အတွက် မှတ်ချက်များ 0 ခုရှိပါတယ်