ဘန်ကောက်၊ အောက်တိုဘာ ၂၇
ထိုင်းနိုင်ငံ၊ ချွန်ဘူရီခရိုင်ရှိ ရဲတပ်ဖွဲ့ဝင်များက မြန်မာလုပ်သားသုံးဦးအား ဖမ်းဆီးကာ ကိုယ်ထိလက်ရောက် ရိုက်နှက်၍ ဘတ်တစ်သိန်း ခြိမ်းခြောက်တောင်းဆိုခဲ့ကြောင်း ထိုင်းနိုင်ငံရှိ The Nation Thailand သတင်းဌာန၏ ဖော်ပြချက်အရ သိရသည်။
အဆိုပါ မြန်မာလုပ်သားသုံးဦးအား ကိုယ်ထိလက်ရောက် ရိုက်နှက်ခြိမ်းခြောက်ကာ ငွေညစ်တောင်းခံခဲ့သည့် ထိုင်းရဲတပ်ဖွဲ့ဝင်များနှင့်စပ်လျဥ်း၍ ဘန်ကောက်အခြေစိုက် လူမှုအဖွဲ့ အစည်းတစ်ခုဖြစ်သည့် “Saimai Survive” အဖွဲ့ထံသို့ လာရောက်တိုင်ကြားခဲ့ကြောင်း ၎င်းအဖွဲ့၏ လူမှုကွန်ရက်စာမျက်နှာထက်တွင် အောက်တိုဘာ ၂၄ ရက်နေ့စွဲဖြင့် ထုတ်ပြန်ထားကြောင်း သိရသည်။
မြန်မာလုပ်သားများ တိုင်ကြားမှုအပြီးတွင် Saimai Survive အဖွဲ့က ထိုင်းရဲများ၏ ကိုယ်ထိလက်ရောက် ရိုက်နှက်မှုကြောင့် ဒဏ်ရာရရှိခဲ့သည့် မြန်မာအမျိုးသားတစ်ဦး၏ ကျော ပေါ်ရှိ ဒဏ်ရာအား မှတ်တမ်းဓာတ်ပုံရိုက်ကာ လူမှုကွန်ရက်တွင် မျှဝေခဲ့ကြောင်း သိရသည်။
ချွန်ဘူရီခရိုင်၊ ဘော်ဝင်းရဲစခန်းမှ ရဲတပ်ဖွဲ့ဝင်များက အောက်တိုဘာ ၂၂ ရက်တွင် မြန်မာလုပ်သားသုံးဦးကို ထိုင်းနိုင်ငံတွင် တရားမဝင်နေထိုင်နေသည်ဟု စွပ်စွဲပြီး ဖမ်းဆီးခဲ့ခြင်းဖြစ် ကြောင်း ထိုင်းနိုင်ငံရှိ The Nation Thailand သတင်းဌာနက ဖော်ပြခဲ့သည်။
“ မြန်မာနိုင်ငံသားတွေ ထိုင်းရဲစခန်းကို ခေါ်ဆောင်သွားခဲ့တယ်။ ရဲတပ်ဖွဲ့ဝင်တွေက မြန်မာအလုပ်သမားသုံးဦးကို တစ်ခန်းစီသီးခြားထားပြီး စစ်ဆေးတယ်။ သံချောင်းနဲ့ ရိုက်နှက်ပြီး အတင်းအဓမ္မ ဝန်ခံခိုင်းခဲ့တယ်။ မြန်မာလုပ်သားတွေက ဘန်ကောက်မြို့၊ ဘန်နားဒေသမှာ နေထိုင်သူတွေဖြစ်ပါတယ်။ ချွန်ဘူရီခရိုင် ဘော်ဝင်းဒေသကို လာလည်ရင်း ဖမ်းဆီးခံရ တာလို့ ထွက်ဆိုကြပါတယ်။ မြန်မာလုပ်သားတစ်ဦးရဲ့ ဖုန်းကိုစစ်ဆေးတဲ့အခါမှာ ဘဏ်အကောင့်ထဲ ဘတ် ၅၀,၀၀၀ နဲ့အထက်တွေ့ရှိခဲ့ပြီး ကျန်နှစ်ဦးရဲ့ ဘဏ်အကောင့်တွေလည်း စစ်ဆေးခဲ့ပါတယ်။ ရဲတပ်ဖွဲ့က အမှုကိုပိတ်သိမ်းပေးမယ်လို့ ကတိပေးပြီး ဘတ်တစ်သိန်းပေးဖို့ တောင်းခံခဲ့တယ်။” ဟု ထိုင်းနိုင်ငံရောက် မြန်မာအလုပ်သမား ကူညီစောင့်ရှောက်ရေး ACC အဖွဲ့မှတာဝန်ရှိသူတစ်ဦးက ယနေ့ခေတ်သို့ ပြောသည်။
လက်ရှိ မတရားဖမ်းဆီး ရိုက်နှက်ခံရသူ မြန်မာနိုင်ငံသားများသည် ထိုင်းနိုင်ငံတွင် တရားဝင်နေထိုင်လုပ်ကိုင်နေကြောင်းနှင့် အထောက်အထားများဖြင့် သက်သေပြခဲ့သော်လည်း ရဲတပ်ဖွဲ့ဘက်က ငြင်းဆိုခဲ့ကြောင်း ထိုင်းနိုင်ငံအခြေစိုက် သတင်းဌာနများက ဖော်ပြခဲ့ကြသည်။
ဖမ်းဆီးခံရ မြန်မာနိုင်ငံသားများ၏ လုံခြုံရေးအတွက် ဘတ်တစ်သိန်းကို ပေးချေခဲ့ရပြီး ထိုင်းရဲတပ်ဖွဲ့များက ATM မှ တစ်ဆင့် ထုတ်ယူခဲ့ကြကြောင်းနှင့် အမှုနှင့်ပက်သက်၍ အခင်းဖြစ်သည့်နေ့တွင် တာဝန်ကျသော ရဲတပ်ဖွဲ့ဝင်အားလုံးကို စုံစမ်းစစ်ဆေးနေဆဲဖြစ်ကြောင်း ဘော်ဝင်ရဲစခန်းက ရဲအရာရှိတစ်ဦးက ပြောဆိုကြောင်း ထိုင်းအခြေစိုက် ဒေသတွင်းသတင်းဌာနများတွင် ဖော်ပြခဲ့သည်။
မြင့်မြတ်အောင်မြင်
ထိုင်းနိုင်ငံတွင် မြန်မာလုပ်သားသုံးဦးအား ရိုက်နှက်၍ ထိုင်းရဲက ဘတ်တစ်သိန်းတောင်း ဟုဆို အတွက် မှတ်ချက်များ 0 ခုရှိပါတယ်