ဘန်ကောက်၊ နိုဝင်ဘာ ၂၁
ထိုင်းနိုင်ငံ၊ ဘန်ကောက်မြို့၊ Bang Len ခရိုင် ၊ Wat Koh Rat ရှေ့လမ်းကွေ့တွင် နိုဝင်ဘာ ၂၀ ရက်၊ မွန်းတည့် ၁၂ နာရီက ပစ်ကပ်ယာဥ်တစ်စီးအရှိန်လွန်ပြီး လမ်းဘေးဓာတ်တိုင်အား ဝင်တိုက်မိခြင်းကြောင့် ရေမြောင်းအတွင်း ထိုးကျတိမ်းမှောက်ခဲ့ပြီး ယာဥ်မောင်းအပါအဝင်လူခုနှစ်ဦး သေဆုံးသွားခဲ့ကြောင်း ဘန်ကောက်ပို့စ်သတင်းဌာနက ဖော်ပြခဲ့သည်။
ပစ်ကပ်ယာဥ်ပေါ် လိုက်ပါစီးနှင်းသူများသည် မြန်မာရွှေ့ပြောင်းလုပ်သားများဖြစ်ကြောင်း ကယ်ဆယ်ရေးအဖွဲ့၏ ပြောဆိုချက်အရ သိရသည်။
“ ယာဉ်ပေါ်မှာ အလောင်းနှစ်လောင်းနဲ့ ရှေ့ထိုင်ခုံမှာတစ်လောင်း။ ကုန်တင်ခန်းအတွင်းတစ်လောင်း။ ကျန်လေးလောင်းက လမ်းဘေးမြောင်းထဲမှာ တွေ့ရှိခဲ့ရပါတယ်။ အသက်ရှင်လျက်ကျန်ရစ်သူ မရှိခဲ့ပါဘူး။ ထိုင်းအာဏာပိုင်တွေရဲ့စိစစ်ချက်အရ မြန်မာရွှေ့ပြောင်းလုပ်သားတွေပါ။” ဟု ရွှေ့ပြောင်းလုပ်သားများကူညီစောင့်ရှောက်ရေးအဖွဲ့ မှ တာဝန်ရှိသူတစ်ဦးက ယနေ့ခေတ်သို့ ပြောသည်။
အဆိုပါပစ်ကပ်ယာဥ်မောင်းသည် ထိုင်းအာဏာပိုင်များက ရှောင်တခင်ရပ်တန့်စစ်ဆေးခြင်းကို လိုက်နာခြင်းမရှိဘဲ အရှိန်ပြင်းစွာမောင်းနှင်ထွက်ပြေးရာမှ ယာဥ်တိမ်းမှောက်မှုဖြစ်ပွားခဲ့ကြောင်း သိရသည်။
သေဆုံးသူများကို မည်သူမည်ဝါသိရှိနိုင်ရန် Bang Len ရဲတပ်ဖွဲ့ကစစ်ဆေးခဲ့ရာ သေဆုံးခဲ့သည့်ယာဥ်မောင်းအနီးတွင် အောင်အောင်ဦးအမည်ရှိ (အသက် ၂၀ နှစ်) ယာဥ်မောင်းလိုင် စင်၊ မြောင်းအတွင်းမျောနေသောခြင်းတောင်း၊ ရေပုံးတစ်ပုံး၊ မီးဖိုချောင်သုံးပစ္စည်းများနှင့်အတူ ထိုင်းဘတ်ငွေ ၁၃,၀၀၀ တို့ကိုတွေ့ရှိခဲ့ကြောင်း သိရသည်။
ယာဥ်တိမ်းမှောက်မှုတွင် ယာဥ်မောင်းအပါအဝင် အမျိုးသားနှစ်ဦးနှင့် အမျိုးသမီးငါးဦး သေဆုံးခဲ့ကြောင်း သိရသည်။
#မြင့်မြတ်အောင်မြင်
ဓာတ်ပုံ – ဘန်ကောက်ပို့စ်
ထိုင်းနိုင်ငံတွင် ပစ်ကပ်ယာဥ်တစ်စီးတိမ်းမှောက် မြန်မာရွေ့ပြောင်းလုပ်သားလူခုနှစ်ဦး သေဆုံး အတွက် မှတ်ချက်များ 0 ခုရှိပါတယ်