ဘန်ကောက်၊ ဒီဇင်ဘာ ၂၀
ထိုင်းနိုင်ငံ၊ စာမွတ်ဆာခွန်ခရိုင်တွင် နေထိုင်ခွင့်သက်တမ်းတိုးခ ကောက်ခံနေခြင်းကို စျေးလျှော့ပေးရန် တောင်းဆိုကြရာ ထိုင်းအာဏာပိုင်နှင့် လုံခြုံရေးတပ်ဖွဲ့ဝင်များက ဖမ်းဆီးလျက်ရှိနေကြောင်း ဘန်ကောက်ပို့စ်သတင်းဌာနက ဒီဇင်ဘာ ၂၀ ရက်၊ နေ့စွဲဖြင့် သတင်းရေးသားထားသည်။
အုန်းနွဲ့၊ အုန်းယိုင်နယ်မြေ၊ ဖိကဆင်ကားလမ်းမကြီးရှိ သံစက်ရုံအနီးတွင် အထောက်အထားအပြည့်အစုံရှိသော မြန်မာလုပ်သား ၃၀၀ ခန့်က နေထိုင်ခွင့် နှစ်နှစ်သက်တမ်းတို့ခ ဈေး နှုန်းလျှော့ချပေးရန် ဒီဇင်ဘာ ၁၉ ရက်၊ နံနက်ပိုင်းက အလုပ်မဝင်မီ စုဝေးဆန္ဒပြတောင်းဆိုခဲ့ကြရာ ထိုင်းအာဏာပိုင်များက ဖမ်းဆီးအရေးယူခဲ့ကြောင်း သိရသည်။
“ နှစ်နှစ်သက်တမ်းတိုးခ စျေးနှုန်းလျှော့ချပေးဖို့တောင်းဆိုတဲ့ အလုပ်သမားတွေကို ထိုင်းအာဏာပိုင်နဲ့ လုံခြုံရေးတပ်ဖွဲ့တွေက နံပါတ်တုတ်ကိုင် ဖမ်းဆီးခိုင်းတာက မြန်မာလုပ်သားတွေအပေါ် အနိုင်ကျင့်ရာရောက်ပါတယ်။ သက်တမ်းတိုးခ အဆမတန်ကောက်ခံလို့ စျေးလေးနည်းနည်းလျှော့ပေးဖို့ ငြိမ်းချမ်းစွာဆန္ဒပြတောင်းဆိုတာပါ။ ယခုလို ကြမ်းတမ်းတဲ့ လက်ထိပ်ခတ်ဖမ်းဆီးတာဟာ အလုပ်သမားအခွင့်အရေးအရရော၊ လူ့အခွင့်အရေးအရရော ဘယ်လိုမှလက်ခံနိုင်စရာမရှိပါဘူး။” ဟု ထိုင်းရောက် ရွှေ့ပြောင်းလုပ်သားများကို အကူ အညီပေးနေသူ (AAC) မှ ဦးရဲမင်းက ယနေ့ခေတ်သို့ ပြောသည်။
ထိုင်းရောက် မြန်မာရွှေ့ပြောင်းလုပ်သားများ၏ နေထိုင်ခွင့် နှစ်နှစ်သက်တမ်းတိုးခ အဆမတန်စျေးနှုန်းတိုးမြှင့်ကောက်ခံမှုအပေါ် လွတ်လပ်စွာဆန္ဒပြတောင်းဆိုမှုအား ဖမ်းဆီးအ ရေးခြင်းသည် အလုပ်သမားအခွင့်အရေးနှင့် လူ့အခွင့်အရေးပါ ချိုးဖောက်ခံနေခြင်းဖြစ်ကြောင်း ထိုင်းရောက်မြန်မာလုပ်သားများက ပြောကြားသည်။
ထိုင်းအစိုးရအနေဖြင့် ရွှေ့ပြောင်းလုပ်သားများအပေါ် ခွဲခြားပြုမှုဆက်ဆံခြင်းသည် နိုင်ငံ့ပုံရိပ်နှင့် ဂုဏ်သိက္ခာကိုလည်း ကျဆင်းစေနိုင်သည့်အတွက် သက်ဆိုင်ရာ ထိုင်းအာဏာပိုင်များအနေဖြင့် ထိရောက်စွာကိုင်တွယ်ပေးစေလိုကြောင်း မြန်မာရွှေ့ပြောင်းလုပ်သားအဖွဲ့၏ တောင်းဆိုချက်အရ သိရသည်။
#မြင့်မြတ်အောင်မြင်
ဓာတ်ပုံ – ဘန်ကောက်ပို့စ်
#ယနေ့ခေတ်
ထိုင်းနိုင်ငံတွင် နေထိုင်ခွင့်အထောက်အထား သက်တမ်းတိုးခလျှော့ပေးရန် တောင်းဆိုသော မြန်မာလုပ်သားများ ဖမ်းဆီးခံရ အတွက် မှတ်ချက်များ 0 ခုရှိပါတယ်