စမွတ်စခွန်၊ မတ် ၈
ထိုင်းနိုင်ငံ၊ စမွတ်စခွန်ပြည်နယ်တွင် ခွင့်ပြုချက်မရှိ စျေးရောင်းချသဖြင့် မြန်မာနိုင်ငံသားခုနစ်ဦးကို ထိုင်းအာဏာပိုင်များက မတ် ၆ ရက်တွင် ဖမ်းဆီးအရေးယူခဲ့ကြောင်း The Nation သတင်းစာက မတ် ၇ ရက်နေ့စွဲဖြင့် ဖော်ပြထားသည်။
မြန်မာရွှေ့ပြောင်းလုပ်သားခုနစ်ဦးသည် ခွင့်ပြုချက်မရှိဘဲ စားသောက်ကုန်ပစ္စည်းနှင့် မိုဘိုင်းလ်ဖုန်းများကို ထိုင်းနိုင်ငံသားများနှင့် ယှဥ်ပြိုင်ရောင်းချခဲ့သည်ဟု ဆိုသည်။
“ ထိုင်းစျေးသည်တွေနဲ့အတူ စားသောက်ကုန်ပစ္စည်းနဲ့ မိုဘိုင်းလ်ဖုန်းပစ္စည်းများကို ယှဥ်ပြိုင်ရောင်းချနေလို့ဆိုပြီး ထိုင်းအာဏာပိုင်တွေဆီ သတင်းပို့တိုင်ကြားချက်ဖွင့်ခဲ့ပါတယ်။ အဲဒီနောက်မှာ သက်ဆိုင်ရာတာဝန်ရှိသူတွေက စုံစမ်းစစ်ဆေးမှုတွေ ဆောင်ရွက်ခဲ့ပါတယ်။ ခွင့်ပြုချက်မရှိ စျေးရောင်းချခြင်းနဲ့ အမှုဖွင့်အရေးယူခံလိုက်ရပါတယ်။” ဟု ထိုင်းရောက် မြန် မာရွှေ့ပြောင်းလုပ်သားများ ကူညီစောင့်ရှောက်ရေးအဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
စမွတ်စခွန်ပြည်နယ်တွင် ထိုင်းနိုင်ငံသားများအတွက် သီးသန့်လုပ်ကိုင်ခွင့်ပေးထားသည့် စီးပွားရေးဆိုင်ရာဥပဒေများကို ချိုးဖောက်ပြီး ဈေးကွက်အတွင်း တရားမဝင်ရောင်းချမှုဖြင့် စွဲချက်အတင်ခံခဲ့ရကြောင်း သိရသည်။
အဆိုပါ မြန်မာရွှေ့ပြောင်းလုပ်သားများက ငါးစိမ်း၊ ငါးခြောက်၊ မြန်မာ့ဟင်းလျာ၊ ကွမ်းယာနှင့် မိုဘိုင်းလ်ဖုန်းများကို ရောင်းချခဲ့ကြောင်း သိရသည်။
#မြင့်မြတ်အောင်မြင်
ဓာတ်ပုံ – The Nation
#ယနေ့ခေတ်
ထိုင်းတွင် မြန်မာနိုင်ငံသားခုနစ်ဦး ခွင့်ပြုချက်မရှိ စျေးရောင်းချသဖြင့် ဖမ်းဆီးခံရ အတွက် မှတ်ချက်များ 0 ခုရှိပါတယ်