ရန်ကုန်၊ မတ် ၁၀
ရန်ကုန်တိုင်းဒေသကြီး၊ တာမွေမြို့နယ်၊ မေတ္တာညွန့်ရပ်ကွက်၊ ဝဏ္ဏသိင်္ဂီလမ်းရှိ နေအိမ်တိုက်ခန်း(ပထမထပ်)တွင် မတ် ၁၀ ရက်၊ ညနေ ၅ နာရီက အိမ်ရှင်အမျိုးသမီးကိုကြိုးတုပ်ကာ အနုကြမ်းစီးမှုဖြစ်ပွားခဲ့ကြောင်း သိရသည်။
အိမ်ရှင်အမျိုးသမီးသည် နေအိမ်အတွင်တစ်ဦးတည်းရှိနေချိန် အမည်မသိသူများက သော့ဖျက်ကာဝင်ရောက်လာပြီး အမျိုးသမီးအားလက်ပြန်ကြိုးတုပ်၍ ဓားဖြင့်မွှန်းပြီး ရွှေထည်ပစ္စည်းနှင့် ငွေများကို အနုကြမ်းစီး ဓားပြတိုက်ခဲ့ကြောင်း သိရသည်။
“ ညနေ ၅ နာရီ ၄၅ မိနစ်ထိ လုံခြုံရေးတပ်ဖွဲ့က စစ်ဆေးနေဆဲပါ။ တန်ဖိုးကြီးတာပါတယ် ပြောတယ်။ ကျပ်သိန်း ဘယ်လောက်ဖိုးပါတယ်ဆိုတာ သေချာမပြောသေးပါဘူး။ အမျိုးသမီးရဲ့ခန္ဓာကိုယ်မှာ ဓားနဲ့အမွှမ်းခံထားရပါတယ်။ ရန်ကုန်မြို့ပြကြီးမှာ အခုလိုအဖြစ်မျိုးတွေကြားရတော့ အိမ်ရှင်မတွေအတွက် အလွန်စိုးရိမ်ရပါတယ်။” ဟု မေတ္တာညွန့်တွင်နေ ထိုင်သူတစ်ဦးက ယနေ့ခေတ်သို့ ပြောသည်။
အမည်မသိအမျိုးသားလေးဦးက အမျိုးသမီးတစ်ဦးတည်း နေအိမ်အပေါ်ထပ်တွင်ရှိနေချိန်ကို အခွင့်အရေးယူကာ တိုက်ခန်းသော့ဖျက်ပြီး အနုကြမ်းစီးခဲ့ခြင်းဖြစ်ကြောင်း သိရသည်။
ဓားဖြင့်အမွှမ်းခံရသည့် အမျိုးသမီးမှာ အသက်အန္တရာယ်စိုးရိမ်ဖွယ်မရှိကြောင်း တာမွေမြို့နယ် လုံခြုံရေးတပ်ဖွဲ့နှင့် နီးစပ်သူများထံက သိရသည်။
#မြင့်မြတ်အောင်မြင်
ဓာတ်ပုံ – Arkar Linn
#ယနေ့ခေတ်
တာမွေတွင် တိုက်ခန်းပထမထပ်၌ အိမ်ရှင်အမျိုးသမီးကိုကြိုးတုပ်ကာ အနုကြမ်းစီး အတွက် မှတ်ချက်များ 0 ခုရှိပါတယ်