ငရုတ်ကောင်း၊ စက်တင်ဘာ ၁၀
ဧရာဝတီတိုင်း၊ ငပုတောမြို့နယ်၊ ငရုတ်ကောင်းမြို့တွင် အမျိုးသားတစ်ဦး ရေစီးနှင့်မျောပါ သေဆုံးခဲ့ပြီး၊ နေအိမ်တစ်လုံးလည်း ရေစီးနှင့်မျောပါသွားကြောင်း ဒေသခံ လူမှုကူညီ ရေးအဖွဲ့များထံမှ သိရသည်။
ယမန်နေ့ စက်တင်ဘာ ၉ ရက်က မိုးသည်းထန်စ္စာ ရွာသွန်းမှုကြောင့် တောင်ကျရေများ အဆက်မပြတ်ထိုးဆင်းလာပြီး တင်းချောင်းကျေးရွာအုပ်စု၊ ယောင်းယင်းကျေးရွာတွင် နေအိမ်တစ်လုံး ရေစီးနှင့်မျောပါသွားသည်။ ထို့အပြင် ရုတ်တရက်ရေစီးလာသည့်အချိန် လမ်းပေါ်တွင်ရှိနေသည့် အမျိုးသားတစ်ဦးမှာ ရေနစ်သေဆုံးခဲ့ကြောင်း သိရသည်။
ရေစီးနှင့်မျောပါသေဆုံးသူမှာ နေမျိုးထွန်းဆိုသူဖြစ်သည်။ ရေစီးနှင့်မျောပါသွားသည့် နေအိမ်တွင် မိသားစုဝင် ၆ ဦးနေထိုင်ပြီး လက်ရှိတွင် အကူအညီများလိုအပ်နေကြောင်း ဒေ သခံ လူမှုကူညီရေးအဖွဲ့ဝင်တစ်ဦးက ပြောသည်။
” ရေစီးနဲ့မျောပါသွားတဲ့ အမျိုးသားရဲ့ ရုပ်အလောင်းကို မနေ့ကညနေပိုင်းမှာ ပြန်တွေ့တယ်။ ရေစီးနဲ့မျောပါသွားတဲ့ နေအိမ်က မိသားစု ၆ ဦးကိုတော့ သူတို့ကို အိမ်ပြောင်းပေး ထားတယ်။ ရေစီးထဲအကုန်ပါသွားတော့ အခု အကူအညီလိုအပ်နေတယ်။ လူတွေအပြင်ရောက်နေလို့ ကံကောင်းတာ။ ရေကတော်တော် စီးနေတာ။” ဟု အထက်ပါပုဂ္ဂိလ်က ဆက်ပြောသည်။
ငရုတ်ကောင်းမြို့တွင် အဆက်မပြတ်ရွာသွန်းနေသည့် မိုးဒဏ်ကြောင့် တောင်ကျရေများ ကျဆင်းလာကာ မြေနိမ့်ပိုင်းရပ်ကွက်များနှင့် ကျေးရွာများတွင်လည်း ရေကြီးရေလျှံ မှုများ ဖြစ်ပေါ်လျက်ရှိကြောင်း ဒေသခံများထံမှ သိရသည်။
ဝဏ္ဏ
ငရုတ်ကောင်းမြို့၌ ရေစီးနှင့်မျောပါပြီး အမျိုးသားတစ်ဦး သေဆုံးခဲ့ကာ နေအိမ်တစ်လုံး ရေစီးနှင့်မျောပါသွားခဲ့ အတွက် မှတ်ချက်များ 0 ခုရှိပါတယ်