ဝါရှင်တန်၊ အောက်တိုဘာ ၂၁
အမေရိကန်နှင့် ဥရောပနိုင်ငံများသည် ဂါဇာဒေသကို မြေပြင်ထိုးစစ်ဆင်နွဲရန် ကြိုးပမ်းနေသော အစ္စရေး၏ကြိုးပမ်းမှုများကို ဆိုင်းငံ့ထားရန် တွန်းအားပေးနေကြောင်း သိရသည်။
ဟားမက်စ်အဖွဲ့က ပြန်ပေးဆွဲထားသူများထဲမှနှစ်ဦးကို ပြန်လည်လွတ်ပေးလိုက်ပြီးနောက် အမေရိကန်နှင့် အနောက်အုပ်စုနိုင်ငံများက အစ္စရေး၏ မြေပြင်ထိုးစစ်ဆင်မှုကို အချိန် ရွှေ့ထားရန် လိုလားနေခြင်းဖြစ်သည်။
အနောက်အုပ်စုနိုင်ငံများသည် ဟားမက်စ်အဖွဲ့၏ ပြန်ပေးဆွဲမှုများထဲတွင် ပါဝင်နေသော ၎င်းတို့နိုင်ငံသားများ ပြန်လွှတ်ချိန်အထိ စောင့်ဆိုင်းစေလိုကြောင်း သိရသည်။
အနောက်အုပ်စုနိုင်ငံများ၏ သံတမန်တစ်ဦးက အမေရိကန်နှင့် ဥရောပနိုင်ငံများ၏ အစိုးရအဖွဲ့သည် ပြန်ပေးဆွဲခံထားသူများ ပြန်လွှတ်မြောက်ရေးအတွက် သံတမန်ရေးနည်းလမ်း ဖြင့် ကြိုးပမ်းမှုအောင်မြင်မှု ရှိ၊ မရှိဆိုသောအချက်ကို စောင့်ကြည့်ကြိုးပမ်းလိုကြောင်း၊ အစ္စရေး၏ မြေပြင်ထိုးစစ်ဆင်မှုများသည် ပြန်ပေးဆွဲခံထားရသူများ အသတ်သေဆုံးရန် အလားလာများသည့်အချက်ကို လက်ခံထားကြောင်း၊ သို့သော်လည်းအစ္စရေးကို လက်ရှိအချိန်တွင် မြေပြင်ထိုးစစ်မဆင်ရန် တိုက်ရိုက်ပြောဆိုခြင်း မရှိသေးကြောင်း ပြောသည်။
အစ္စရေးက ၎င်းတို့သည် ဟားမက်စ်၏ အခြေခံအဆောက်အဦးများ ဖျက်ပစ်ရန်အတွက် မြေပြင်ထိုးစစ်ဆင်နွဲရန် ရည်ရွယ်ခြင်းဖြစ်ကြောင်း၊ ဂါဇာကမ်းမြောင်ဒေသကို ထိန်းချုပ် ထားသော ဟားမက်စ်လက်နက်ကိုင်အဖွဲ့တစ်ခုလုံး အမြစ်ပြတ်ချေမှုန်းရန် ဆန္ဒရှိနေကြောင်း ပြောသည်။
အစ္စရေးက ၎င်းတို့သည် ဟားမက်စ်၏ နေရာအားလုံးကို တိုက်ခိုက်မည်ဖြစ်သော်လည်း အရပ်သားများ ထိခိုက်မှုနည်းပါးအောင် လုပ်ဆောင်မည်ဟု ပြောထားသည်။
အမရိကန်အစိုးရက ပြန်ပေးဆွဲထားသူများ ပြန်လွှတ်ပေးချိန်အထိ အစ္စရေးအနေဖြင့် မြေပြင်ထိုးစစ်ဆင်နွဲခြင်းကို ရပ်တန့်ထားရန် လိုလားနေကြောင်း သိရသည်။
အစ္စရေးစစ်သားသိန်းချီနှင့် တင့်ကားများသည် ဂါဇာဒေသကို မြေပြင်ထိုးစစ်ဆင်နွဲရန် နယ်စပ်ဒေသတွင် စောင့်ဆိုင်းလျက်ရှိနေရာ မကြာမီ မြေပြင်ထိုးစစ်ဆင်မှုများ စတင်ဖွယ်ရှိ နေသည်ဟု ပြီးခဲ့သောရက်ပိုင်းက သတင်းများထွက်ပေါ် ခဲ့သည်။
အစ္စရေးသည် အလစ်အငိုက်တိုက်ခိုက်ခံရပြီးနောက် ဟားမက်စ်လက်နက်ကိုင်အဖွဲ့ ထိန်းချုပ်ထားသော ဂါဇာဒေသကို လေကြောင်းတိုက်ခိုက်မှုများ လုပ်ဆောင်ခဲ့ကြောင်း သိရ သည်။
ကောင်းထက်ငွေ
ဂါဇာဒေသကို မြေပြင်ထိုးစစ်ဆင်နွဲရန် ကြိုးပမ်းနေသော အစ္စရေး၏ ကြိုးပမ်းမှုများကို ဆိုင်းငံ့ထားရန် အနောက်အုပ်စုနိုင်ငံများ လိုလားနေ အတွက် မှတ်ချက်များ 0 ခုရှိပါတယ်