ကျိုက်ထို၊ ဧပြီ ၁၁
မွန်ပြည်နယ်၊ ကျိုက်ထိုမြို့နယ်၊ ကျိုက်ထို-ဘီးလင်းအကြား၊ မိုင်တိုင်အမှတ် ၁၉၆/၇၊ သံတံတားအနီးတွင် ဧပြီ ၁၁ ရက်၊ နံနက် ၆ နာရီ ၅၀ မိနစ်အချိန်က ခရီးသည်တင်ယာဥ်နှင့် ဂတ်စ်အိုးများ သယ်ဆောင်လာသည့် ကုန်တင်ယာဥ်တို့ တိုက်မှုဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့က သိရသည်။
“ ခရီးသည်ယာဥ်နဲ့ ဂတ်စ်အိုးတွေ သယ်ဆောင်လာတဲ့ကား တိုက်မှုဖြစ်တယ်။ ဂတ်စ်အိုးတွေသယ်ဆောင်လာတဲ့ယာဥ် တိမ်းမှောက်သွားပါတယ်။ ဂတ်စ်အိုးတွေ ပေါက်ကွဲပျက်စီးမှုမဖြစ်အောင် အချိန်မီ ဆောင်ရွက်နိုင်ခဲ့ပါတယ်။ လူထိခိုက်သေဆုံးမှု မရှိခဲ့ပါဘူး။” ဟု မြန်မာနိုင်ငံမီးသတ်တပ်ဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
အဆိုပါ ယာဥ်တိုက်မှုကြောင့် ယာဥ်မောင်းများနှင့် ခရီးသည်များ ထိခိုက်ဒဏ်ရာရရှိခြင်း မရှိခဲ့သော်လည်း မော်တော်ယာဥ်နှစ်စီးစလုံး ထိခိုက်ပျက်စီးမှုရှိခဲ့ကြောင်း သိရသည်။
ခရီးသည်တင်ယာဉ်နှင့် ဂတ်စ်အိုးများသယ်ဆောင်လာသည့်ကုန်တင်ယာဉ်တို့ တိုက်မှုဖြစ်ပွားခဲ့ခြင်းကြောင့် ဘီးလင်းမြို့နယ်မီးသတ်စခန်းမှ မီးငြှိမ်းသတ်ယာဉ်တစ်စီး၊ ရေသယ်ယာဉ်တစ်စီးတို့ဖြင့် ဂတ်စ်အိုးများ မီးလောင်မှုမဖြစ်ပွားစေရေး အအေးပေးခြင်းလုပ်ငန်းများ ဆောင်ရွက်ပေးခဲ့ကြောင်း သိရသည်။
မြင့်မြတ်အောင်မြင်
ဓါတ်ပုံ – မြန်မာနိုင်ငံမီးသတ်တပ်ဖွဲ့
ခရီးသည်ယာဥ်နှင့် ဂတ်စ်အိုးများသယ်ဆောင်လာသည့် ကုန်တင်ယာဥ်တို့ တိုက်မှုဖြစ်ပွား အတွက် မှတ်ချက်များ 0 ခုရှိပါတယ်