အုတ်တွင်း၊ဧပြီ ၁၂
ပဲခူးတိုင်းဒေသကြီး၊ အုတ်တွင်းမြို့နယ်၊ မဲကုန်းရပ်ကွက်၊ ကံတော်ကျောင်းတိုက်တွင် ဧပြီ ၁၁ ရက်၊ ည ၈ နာရီ ၅၆ မိနစ်က လာရောက်သီတင်းနေထိုင်တော်မူသော သံဃာတော်နှစ်ပါးက အရက်မူးပြီး ကျောင်းထိုင်ဆရာတော်အား ဓားဖြင့်ထိုးရန်ပြုလုပ်သဖြင့် ဖမ်းဆီးလူဝတ်လဲ အရေးယူလိုက်ကြောင်း သိရသည်။
“ မြို့နယ်ဥက္ကဌဆရာတော်ကြီးက ဖုန်းဆက်ညွှန်ကြားလို့ အုတ်တွင်းမြို့၊ မဲကုန်းရပ်ကွက်၊ ကံတော်ကျောင်းမှာ လာရောက်သီတင်းသုံးတဲ့ သံဃာတော်နှစ်ပါးက ကျောင်းထိုင်ဆရာတော်ကြီးကို ဓားနဲ့ထိုးမယ်လုပ်တယ်။ ဒါကြောင့် ဒီကိုယ်တော်နှစ်ပါးကို သိက္ခာချ လူဝတ်လဲပြီး သက်ဆိုင်ရာကို လွှဲအပ်လိုက်ပါပြီ။” ဟု ဆရာတော်အရှင်တေဇ (ဝိသောဓနီ)က မိန့်ကြားသည်။
ပဲခူးမြို့နယ်ဥက္ကဌ ဆရာတော်ကြီး၏ ညွှန်ကြားချက်အရ အုတ်တွင်းမြို့၊ မဲကုန်းရပ်ကွက်၊ ကံတော်ကျောင်းတွင် လာရောက်သီတင်းသုံးတော်မူသော သံဃာတော်နှစ်ပါး၏ အရက်သေစာ သောက်စားမူးယစ်ခြင်းကြောင့် ရပ်ကျေးဥက္ကဌ ဆရာတော်နှင့် အကျိုးတော်ဆောင်ဆရာတော်များက သိက္ခာချလူဝတ်လဲပြီး အုတ်တွင်းမြို့မရဲစခန်းက တာဝန်ရှိသူများထံ လွှဲပြောင်းအပ်ခဲ့ကြောင်း သိရသည်။
အဆိုပါ သိက္ခာချ လူဝတ်လဲ သံဃာတော်နှစ်ပါးအား အုတ်တွင်းမြို့မရဲစခန်းက သာသနာညိုးနွမ်းစေမှု ပုဒ်မ (၂၉၅/၂၉၅-က)ဖြင့် အမှုဖွင့်အရေးယူလိုက်ကြောင်း သိရသည်။
မြင့်မြတ်အောင်မြင် ဓါတ်ပုံ – ဆရာတော်အရှင်တေဇ (ဝိသောဓနီ)
ကျောင်းထိုင်ဆရာတော်အား အရက်မူးပြီး ဓားဖြင့်ထိုးရန်ပြုလုပ်သဖြင့် လူဝတ်လဲဖမ်းဆီး အတွက် မှတ်ချက်များ 0 ခုရှိပါတယ်