ရန်ကုန်၊ မေ ၂၂
မန္တလေးတိုင်းဒေသကြီး၊ ကျောက်ဆည်မြို့နယ်၊ ဘောဂဝတီရပ်(ဆီဆုံ)ရပ်တွင် မေ ၂၂ ရက်၊ နံနက် ၁ နာရီ ၅၀ မိနစ်က နေအိမ်မီးလောင်မှုကြောင့် ပညာရေးဝန်ထမ်း(ငြိမ်း) မိသားစုဝင်လေးဦး သေဆုံးမှုဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့မှ သိရသည်။
မီးလောင်မှုကြောင့် သက်ကြီးပညာရေးဝန်ထမ်း(ငြိမ်း) အသက်(၉၃)နှစ် ဆရာမဒေါ်တင်အောင် အသက်(၇၅)နှစ် ဆရာမဒေါ်ထွေးထွေး(မြို့နယ်ပညာရေးမှူးအငြိမ်းစား) အသက် (၆၆)နှစ် ဆရာမဒေါ်နွယ်နွယ်ဦး(မြို့နယ်ပညာရေးမှူး-ငြိမ်း)နှင့် အသက်(၅၈)နှစ် ဆရာမဒေါ်ခင်သူဇာ(အမက-ကျောင်းအုပ်) သပြေကုန်းကျေးရွာ၊ ကျောက်ဆည်မြို့တို့ လေးဦးစလုံး သေဆုံးခဲ့ရကြောင်း သိရသည်။
“ မီးလောင်မှုအားပြင်းပါတယ်။ တစ်နာရီကြာ မီးငြိမ်းသတ်ခဲ့ရပါတယ်။ မီးလောင်မှုထဲမှာ အပေါ်ထပ်မှာ သက်ကြီးအမျိုးသမီးနှစ်ဦးအလောင်းနဲ့ အောက်ထပ်က အမျိုးသမီးနှစ်ဦးအလောင်း တွေ့ရှိခဲ့ရပါတယ်။ သက်ကြီးပိုင်းတွေမို့ မီးလောင်မှုထဲပိတ်မိသွားတယ် ထင်ပါတယ်။ မီးလောင်မှုက ဝါယာလျော့ဖြစ်တာလို့ ယူဆရပါတယ်” ဟု မြန်မာနိုင်ငံမီးသတ်တပ်ဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
အဆိုပါ သက်ကြီးပိုင်းပညာရေးဝန်ထမ်း(ငြိမ်း) မိသားစုဝင်လေးဦး၏ ရုပ်အလောင်းများကို KYAUKSE RESCUE က မော်တော်ယာဥ်ဖြင့် ကျောက်ဆည်ဆေးရုံကြီး ရင်ခွဲရုံသို့ ကူညီပို့ဆောင်ပေးခဲ့ကြောင်း သိရသည်။
နေအိမ်အတွင်း အသုံးပြုထားသည့် ဆိုလာဘက်ထရီမှတစ်ဆင့် ဝါယာရှော့ဖြစ်ပြီး မီးလောင်မှုဖြစ်ခဲ့သည်ဟုယူဆကြောင်း မြန်မာနိုင်ငံမီးသတ်တပ်ဖွဲ့က ကနဦးသတင်းထုတ်ပြန်ချက်အရ သိရသည်။
လက်ရှိ မီးလောင်မှုဖြစ်စဥ်ကို ဝါယာလျော့ဟု ကနဦးထုတ်ပြန်ခဲ့ပြီး မီးလောင်မှုအဆင့် Level ကို ယနေ့ခေတ်မှ သီးခြားအတည်ပြုချက် မရရှိသေးပေ။
မြင့်မြတ်အောင်မြင်
ဓာတ်ပုံ – ကျောက်ဆည်လူမှုကူညီရေးအသင်း
ယနေ့ခေတ်
ကျောက်ဆည်တွင် နေအိမ်မီးလောင်မှုကြောင့် ပညာရေးဝန်ထမ်း(ငြိမ်း) မိသားစုဝင်လေးဦး သေဆုံး အတွက် မှတ်ချက်များ 0 ခုရှိပါတယ်