ရန်ကုန်၊ မတ် ၅
ရန်ကုန်တိုင်းဒေသကြီး၊ ဆိပ်ကြီးခနောင်တိုမြို့နယ်မှ ကလီဆိပ်ကမ်းသို့ မောင်းနှင်လာသည့် သမ္ဗာန်တစ်စီး ကလီဆိပ်ကမ်းအနီးတွင် မတ် ၄ ရက်၊ မွန်းလွဲ ၃ နာရီက တိမ်းမှောက်သွားခဲ့ပြီး တစ်ဦးပျောက်ဆုံးနေကြောင်း သိရ သည်။
သမ္ဗာန်တစ်စီးတိမ်းမှောက်ပြီး သမ္ဗာန်ပေါ်လိုက်ပါစီးနင်းသူ ၁၂ ဦးအနက် တစ်ဦးပျောက်ဆုံးနေကြောင်း မြန်မာနိုင်ငံမီးသတ်တပ်ဖွဲ့ထံမှ စုံစမ်းသိရှိရသည်။
“ သမ္ဗာန်မောင်းသူတစ်ဦးအပါအဝင် လူ၁၂ ဦးအနက်မှာ ၁၁ ဦးကို ပြန်လည်ကယ်ဆယ်ရရှိခဲ့ပါတယ်။ လက်ရှိတစ်ဦးပျောက်ဆုံးနေပါတယ်။ ဆက်လက်ရှာဖွေနေဆဲပါ။ ကယ်ဆယ်ရရှိသူတွေကို ရန်ကုန်ပြည်သူ့ဆေးရုံကြီးကို ကူညီပို့ဆောင်ပေးခဲ့ပါတယ်။” ဟု မြန်မာနိုင်ငံမီးသတ်တပ်ဖွဲ့မှ တာဝန်ရှိသူတစ်ဦးက ယနေ့ခေတ်သို့ ပြောသည်။
ယခုအခါ ကလီဆိပ်မှ ပန်းဆိုးတန်းဆိပ်ကမ်းအထိ ဆိပ်ကြီးခနောင်တိုမြို့နယ် မီးသတ်စခန်းမှ ရှာဖွေကယ်ဆယ်ရေးတပ်ဖွဲ့ဝင်များ၊ ပန်းဆိုးတန်းဆိပ်ကမ်းမှ ဗိုလ်တစ်ထောင်ဆိပ် ကမ်းထိ ကျောက်တံတားမြို့နယ် မီးသတ်စခန်းမှ ရှာဖွေကယ်ဆယ်ရေးတပ်ဖွဲ့ဝင်များက ရှာဖွေကယ်ဆယ်ရေးလုပ်ငန်းများ ဆောင်ရွက်နေကြောင်း သိရသည်။
#မြင့်မြတ်အောင်မြင်
ဓာတ်ပုံ – မြန်မာနိုင်ငံမီးသတ်တပ်ဖွဲ့
#ယနေ့ခေတ်
ကလီဆိပ်ကမ်းအနီးတွင် သမ္ဗာန်တစ်စီးတိမ်းမှောက် တစ်ဦးပျောက်ဆုံး အတွက် မှတ်ချက်များ 0 ခုရှိပါတယ်