လှည်းကူးမြို့၌ ရေအနည်းငယ် ပြန်ကျသော်လည်း အိမ်ထောင်စုသုံးရာခန့် နေရပ်မပြန်နိုင်သေး

ရန်ကုန်၊ အောက်တိုဘာ ၁၆

ရန်ကုန်တိုင်း၊ လှည်းကူးမြို့နယ်၊ ရေကြီးရေလျှံမှုများကြောင့် ရေဘေးလွတ်ရာရှောင်နေရသည့် အိမ်ထောင်စုသုံးရာခန့်သည် နှစ်ပတ်ကြာသည်အထိ နေရပ်သို့မပြန်နိုင် သေးကြောင်း ဒေသခံ ပရဟိတအသင်းများမှ သိရသည်။

လက်ရှိတွင် ရေဘေးရှောင်နေသူ အများစုမှာ လှည်းကူးမြို့နယ် အနိမ့်ပိုင်းရှိ ကျေးရွာများမှဖြစ်ပြီး လှည်းကူးမြို့ပေါ်ရှိ ရေလွတ်ရာ ဘုန်းကြီးကျောင်း၊ ဘောလုံးကွင်းနှင့် ဓမ္မာရုံတို့တွင် ရေဘေးရှောင်နေရကြောင်း သိရသည်။

“ ရေကျတယ်ဆိုတာ ပြောပလောက်အောင် မဟုတ်ပါဘူး။ တစ်လက်မ၊ နှစ်လက်မလောက်ကျတာ။ အနိမ့်ပိုင်းရွာတွေဆိုရင် ရင်ခေါင်းလောက်အထိရှိသေးတယ်။ မြို့ပေါ်မှာ တော့ ကျပါတယ်။ အခု အိမ်ပြန်လို့မရတဲ့ အိမ်ထောင်စု သုံးရာလောက်ကို ကျွန်တော်တို့အသင်းက ရိက္ခာခြောက်တွေပေးသလို တစ်ချို့ရေဘေးမရှောင်ဘဲ အိမ်မှာနေတဲ့သူ တွေအတွက် ထမင်းနဲ့ဟင်း လိုက်ပို့ပေးတယ်။” ဟု ဂရုဏာရှင် ပရဟိတအသင်းမှ တာဝန်ရှိသူတစ်ဦးက ယနေ့ခေတ်သို့ ပြောသည်။

အောက်တိုဘာ ၇ ရက်မှစတင်ကာ ငမိုးရိပ်ချောင်း ရေတက်လာခြင်းနှင့် မိုးသည်းထန်စွာ ရွာသွန်းမှုများကြောင့် လှည်းကူးမြို့နယ်အတွင်းရှိ ကျေးရွာအချို့ ရေလွှမ်းမိုးခဲ့ပြီး ဒေသခံ လေးထောင်ကျော်တို့ ရေဘေးလွတ်ရာသို့ ရှောင်ခဲ့ရကြောင်း၊ လက်ရှိတွင် ကယ်ဆယ်ရေးများ အလွယ်တကူ မသွားရောက်နိုင်သည့် ကျေးရွာများ သောက်ရေနှင့် ရိက္ခာ အရေးပေါ်လိုအပ်နေပြီး ပိတ်မိနေသည့်သူများကို ကယ်ထုတ်ရန် လှေများလည်း လိုအပ်နေကြောင်း သိရသည်။

အောင်သူရိန်

ဓာတ်ပုံ – လှည်းကူးကြက်ခြေနီ

#ယနေ့ခေတ်

လှည်းကူးမြို့၌ ရေအနည်းငယ် ပြန်ကျသော်လည်း အိမ်ထောင်စုသုံးရာခန့် နေရပ်မပြန်နိုင်သေး အတွက် မှတ်ချက်များ 0 ခုရှိပါတယ်