မြဝတီမြို့၌ ကျောင်းဝင်းအတွင်း တရားထိုင်နေသည့် အမျိုးသားတစ်ဦး လုယက် သတ်ဖြတ်ခံရ

မြဝတီ၊ ဩဂုတ် ၁၅

ကရင်ပြည်နယ်၊ မြဝတီခရိုင်၊ မြဝတီမြို့၊ မိချောင်းကုန်း ဘုန်းကြီးကျာင်းဝင်းအတွင်း တရားထိုင်နေသည့် အမျိုးသားတစ်ဦး လုယက် ရိုက်နှက်ခံရ၍ သေဆုံးသွားကြောင်း ရဲတပ်ဖွဲ့ နှင့်နီးစပ်သူများထံမှ သိရသည်။

ယနေ့ သြဂုတ် ၁၅ ရက် နံနက်ပိုင်းက ဘုန်းတော်ကြီးကျောင်းအတွင်း တရားထိုင်နေသည့်အချိန် ရိုက်နှက်ခံရပြီးဖုန်းနှင့် ပိုက်ဆံအိတ် လုယက်ယူဆောင် သတ်ဖြတ်သွားခြင်းဖြစ် ကြောင်း သိရသည်။

” အုတ်ခဲနဲ့ထုခံရတဲ့ပုံစံ အုတ်ခဲအကျိုးတွေ ကိုယ်ခန္ခာမှာတွေ့ရတယ်။ လုယက် သတ်ဖြတ်ခံရတဲ့အမျိုးသားက အသက် ၄၀ ခန့်အရွယ်လောက်ရှိမယ်။ ပရဟိတအဖွဲ့တွေက ဆေး ရုံတင်ပို့ပေမယ့် သေဆုံးသွားတယ်။ အဲ့ဒီအမျိုးသားက မြဝတီမြို့က၊ မိချောင်းကုန်းဘုန်းကြီးကျောင်းကိုလာပြီး နေ့တိုင်းလိုလို တရားထိုင်၊ ပုတီးစိပ်လေ့ရှိသူပါ။” ဟု ရဲတပ်ဖွဲ့ နှင့် နီးစပ်သူတစ်ဦးကပြောသည်။

အဆိုပါဖြစ်စဉ်ကို တာဝန်ရှိသူများမှ စစ်ဆေးလျက်ရှိပြီး အလောင်းကို Myanmar Rescue (မြဝတီ)နှင့် အလင်းသစ်-Rescue Myawaddy အဖွဲ့မှ မြဝတီခရိုင်ဆေးရုံကို ပို့ဆောင် ခဲ့ကြောင်း သိရသည်။

မြဝတီမြို့တွင် ပြီးခဲ့သည့် ဇူလိုင်လကလည်း ငွေလွှဲလုပ်ငန်း လုပ်ကိုင်သည့်အိမ် ဓားပြတိုက်ခံရပြီး လူများရိုက်နှက်ခံခဲ့ရသေးကြောင်း သိရသည်။

#ဝဏ္ဏ

#ယနေ့ခေတ်

ဓာတ်ပုံ – အလင်းသစ်-Rescue Myawaddy

မြဝတီမြို့၌ ကျောင်းဝင်းအတွင်း တရားထိုင်နေသည့် အမျိုးသားတစ်ဦး လုယက် သတ်ဖြတ်ခံရ အတွက် မှတ်ချက်များ 0 ခုရှိပါတယ်